Umul-kheyr Sadri Cabdalla iyo Khadiija Abubakar C/qaadir oo muddo dhowr sanno ah ku xiran Xabsi ku yaalla dalka Kenya waxaa shalay la soo taagay Maxkamad ku taalla magaalladda Mombasa.
Haweenkaasi waxay beeniyeen inay u socdaal lahaayeen Somalia, si ay ugu biiraan Alshabaab, inkastoo Dacwad-oogayaasha sheegeen inay haweenkaasi ka soo qabteen Degmadda Ceel-waaq, xilli ay ka gudbi lahaayeen Xuduudka Somalia.
Labada Haween waxay Maxkamadda Mombasa ka hor sheegeen inay ahaayeen Arday ka yimid Tanzania,isla markaana ay Waxbarasho u joogeen Kenya.
Umul-kheyr Sadri Cabdalla waxay sheegtay in markii la xirayey ay ahayd Arday Cilmiga Caafimaadka ka barata Jaamacadda Afiiq ee dalka Sudan, balse Kenya u joogtay Barnaamij Waxbarasho oo Kooban.
Waxay kaloo sheegtay inay bishii March 23-dii ee sannadkii 2015-kii Diyaarad Ethiopian Airlines ka soo raacday Sudan, kana soo degtay Garoonka Jomo Kenyatta ee magaalladda Nairobi.
Umul-kheyr Sadri Cabdalla waxay Maxkmaadda u sheegay inay Ciiddanka Kenya ka qaateen Baasaboorkeeda, Waraaqaha Aqoonsiga Ardaynimo, Mobayl, Laptop iyo Dukumentiyadda Jaamacadda.
Waxay Maxkamadda u sheegtay in magaceeda laga tiray Liiska Jaamacaddii ay dhiganaysay, kadib, markii iyada lagu soogay dacwo looga been abuuray.
Dhinaca kale, Umul-kheyr Sadri Cabdalla iyo Khadiija Abubakar C/qaadir waxay codsadeen in laga siidaayo Maxkmadda, maadaama aan la haynin dad ku markhaati furaya Kiiska lagu soo oogay.
Garsooraha Maxkamadda Mombasa waxa uu sheegay in Difaaca Kiiskooda dib loo dhegeysan doono bisha soo socota ee July 2-da.
