Bahame Nyadunga oo ah Khabiir madax bannaan oo u xil saaran xaalladda Xuquuqda Aadanaha ee Somalia ayaa sheegay inay horumar laga sameeyey dhowrista Xuquuqda Aadahana, inkastoo ay weli jiraan xadgudubyo loo geysto dadka rayidka ah.
Isaoo ka hadlayey Kulan ay Golaha Xuquuqda Aadanaha ee QM ku yeesheen magaalladda Geneva ee dalka Switzerland ayuu sheegay inay weli jiraan tiro dhacdooyin oo dabiici ah iyo kuwo dad-samays ah, wuxuuna farta ku fiiqay Weeraradda Alshabaab iyo Dagaalladda Beelaha ee ka dhaca qeybo ka mid ah Somalia inay galaaftaan nolosha dad badan oo rayid ah, waa sida uu hadalka u dhigay.
Khabiirka waxa uu xusay inay Dagaalladda Beelaha salka ku hayaan muran dhinaca Kheyraadka iyo Awood-qeybsiga.
Khabiir madax bannaan oo u xil saaran xaalladda Xuquuqda Aadanaha ee Somalia, Bahame Nyadunga waxa uu DFS uga mahad celiyey iskaashiga ay ka geystaan Dhowrista Xuquuqda Aadanaha, wuxuu kaloo bogaadiyey Beesha Caalamka oo uu xusay inay Somalia ka taageereen sidii loo xaqiijin lahaa xaalladda Xuquuqda Aadanaha ee Somalia.
Waxa kale oo uu soo hadal qaaday Shirweynihii Arrimaha Somalia ee bilowgii sannadkan lagu qabtay magaalladda London, wuxuuna xusay in lagu taageeray dib-u-habaynta Hay’addaha Ammaanka iyo Caddaaladda, Dowlad-wanaaga, Dimuqraadiyeynta, dhismaha Nabadda iyo Istaraatijiyadda Ka-bixitaanka AMISOM ee Somalia.
Bahame Nyadunga waxa kale oo ka hadlay saamiga ay Haweenka ka heleen Kuraasta Labada Gole ee BFS, wuxuuna xusay inay Haweenka caqabado kala kulmeen Dhaqanka iyo Alshabaab, waa sida uu hadalka u dhigay.
Waxa kale oo uu Warbixintiisa ku sheegay inay DFS haatan ku hawlan tahay dhamaystirka Sharciga iyo Jadwalka Shaqo ee qaab dhismeedkaHay’adeed ee Doorashadda dhici doonta sannadka 2021-ka.
Khabiirka madax bannaan ee u xil saaran xaalladda Xuquuqda Aadanaha ee Somalia, Bahame Nyadunga waxa u uugu dambeyntii rajo ka muujiyey in Is-faham laga gaari doono dhamystirka Axdi-qarameedka Somalia iyo qoddobadda Siyaasadda ee weli lagu murunsan yahay oo ay ka mid yihiin Sharciyeynta Xisbiyadda Siyaasadda iyo sidii Nidaamka Beelaha looga gudbi lahaa.
