Faallo:- Isla-xisaabtanka Dowladda Federalka yaan lagu koobin Nabadgeliyo-xumidda.

Horaa loo yiri Waqtigu waa sida Seef oo haddaan jarin uu isagu ku jarayo ama kula tegayo, waxaana Maahmaahdaasi laga dhaxli karaa in Dowladda Federalka waqtiga ka sii gurayo, iyadoo ay weli farri ka qodnayn Hawlaha qabyadda u ah ee aan waqtiga loo heli doonon dhamaystirkooda.

Labadii maalmood ee ugu dambeysay, Golaha Barlamaanka Federalka waxay Kulan Su’aaleed Isla-Xisaabtan leh kula jireen Ra’isul-wasare Cumar C/rashiid iyo qaar ka mid ah Taliyayaasha Hay’addaha Ammaanka.

Inkastoo Kulamadaasi la muujinayo inuu ku salaysan yahay La-xisaabtanka dhinaca Ammaanka iyo Qaraxyadda Alshabaab, ayaa waxaa haddana la dareensan yahay inay Xildhibaanadda BFS gocasho ka qabaan Qoddobo ay u arkaan in lagu xadgudbay Xasaanadooda, gaar ahaan falal ay sheegeen in qaar ka mid ah Xildhibaanadda  lagu baaray Garoonka Diyaaradaha.

Xaqiiq ahaan, xilligan waxaa habboon in ay Madaxda Labada Gole meel iska dhigaan Is-dhaliisha, isla markaana u midoobaan Xoojinta Nabadda iyo Dhamaystirka qoddobadda udub-dhexaadka u ah Fulinta Nidaamka Doorashadda, oo ay ka dhiman tahay bilooyin fara-ku-tiris ah.

Xeeldheerayaasha Siyaasadda ayaa rumeysan in La-xisaabtanka ka socda Golaha Barlamaanka inuu bud-dhig u yahay Arrimaha Ammaanka iyo in lala xisaabtamo Hay’adaha loo xaglinayo Habacsanaantaasi iyo  qaraxyadda lagu hoobtay ee ka dhacay Muqdisho iyo Baydhabo, balse ay jiraan arrimo badan oo Xasaasi ah oo Xilligan Taagan, sida Meel-marinta Nidaamka Federalka, La-tashiyadda qabyadda ah Isfahamka Dowladda Federalka iyo Maamul-gobaleedka Puntland iyo Hagaajinta Nidaamka Maaliyadda iyo Samaynta Lacagta Qaranka, iyadoo haatan la og yahay in Dollar ku xiran tahay Nolosha iyo Badeecadaha dalka.

Mashaqo Taagan ayey noqotay Sugidda Ammaanka iyo Qaraxyadda, waxayna Dowladihii KMG iyo Dowladdan Federalka ka qaadeen madax-daalis iyo Is-eedeyn joogto ah, waxaana xilalkooda ku waayey Mas’uuliyiin iyo Saraakiil loo xagliyey inay dhinacooda ka jirtay Habacsanaantaasi.

Haatan, Xildhibaanadda Barlamaanka Federalka ayaa u muuqqa kuwo Seefta Galka kala baxay, si ay La-xisaabtan dhab ah ku Gole keenaan Xubnaha Golaha Wasiiradda iyo Taliyayaasha Hay’addaha Ammaanka, si ay wax uga weydiiyaan Dhacdooyinka halista ku ah Ammaanka Guud ee dalka, gaar ahaan Magaallo-madaxdeenna.

Dhowrkii bilood ee la soo dhaafay, Dharaar Cad ayey Hoobiyayaal ku soo hoobteen meelo ku dhow Madaxtooyadda iyo Golaha Barlamaanka, iyadoo duqeyntaasi oo ay Alshabaab sheegatay ku geriyoodeen dad rayid ah oo aan waxba galabsanin.

Waana uur-ku-taallo inay Alshabaab weli fursad u helaan inay Muqdisho ka geystaan duqeymo iyo qaraxyo, oo ay ugu darnaayeen Qaraxyaddii Jimcihii hore lala beegsaday Hotelka iyo Barxadda SYL ee sababay dhimashadda, dhaawaca iyo burburka ballaaran.

Isla Xisaabtanka ay Xildhibaanadda haatan bilaabeen ayaan la ogeyn waxa ku soo beegay Xilligan, waxaana laga yaabaa in looga dan leeyahay Is-muujin Siyaasadeed iyo  in Miisaan cusub lagu yeesho Xilliga Kala-guurka Siyaasadeed.

Si kastaba ha ahaatee, Isla-xisaabtanka yaan lagu soo koobin Nabadgelyo-xumida, balse ha laga dhigo Isla-xisaabtan Furan oo dhinacyadda Siyaasadda, Maamulka, Dhaqaalaha, Nolosha Bulshadda iyo Danaha Guud ee Qaranka.

©Radio Dalsan