Waxaa magaalladda Muqdisho dib ugu soo laabtay Guddi Odayaal ah oo uu hoggaaminayey Maxamed Cabdi Shiddo, kuwaasi oo sifo aan sharciyeysnayn ku doonayey inay ku matalaan Odayaasha Beesha Wacayle.
Ilo-wareedyo ayaa u sheegay Idaacadda Dalsan Radio inay Dowladda Federalka u yeertay Odayaashaasi, si ay ula yeeshaan Wada Tashiyo dheraad ah.
Guddigaasi ayaa waxa la sheegay inay doonayeen inay feer ordaan Guddiga Rasmiga ee Odayaasha Beesha Wacaysle oo ay Wasaaradda Arrimaha Gudaha iyo Federalka ee Xukuumadda Federalka Somalia magacowday.
Guddiga Odayaasha Beesha Wacayle ee loo idmay Ka-qeybgalka Shirka Maamul-u-samaynta Goballadda Dhexe, waxaa madax u ah Caaqil C/llaahi Geeddi Shadoor, waxaa kaloo xubno ka ah wakiillo matalaya Siyaasiyiinta, Waxgaradka, Aqoonyahannadda, Culumaa’udiinka iyo Ururradda Bulshadda ee Beesha Wacaysle, oo ka mid ah Beelaha wada deggan Goballadda Dhexe.
Dhinaca kale, War Saxaafadeed ay Beesha Wacaysle soo saareen isbuucii hore ayaa lagu xusay inay Kalsoonida kala laabteen Guddiga Darsamadda ee Shirka Maamul-u-samaynta Goballadda Dhexe ee haatan ka socda Degmadda Cadaado ee Gobalka Galgaduud.
Waxay Beesha Wacaysle u cuskadeen arrintaasi iyadoo la ogsonyahay inaan guddigaasi lagu soo xulin rabitaanka iyo kalsonida Beelaha balse ay ahayeen xubno ay Dowladu iskeed u soo magacaabatay.
