Donald Trump:- “Hoggaamiyaha Waqooyiga Kuurya waa i caayey, wuxuuna iigu yeeray Duq”

Madaxweynaha dalka Maraykanka, Donald Trump ayaa hadalkaasi maanta ku sheegay Qoraal uu soo dhigay Bartiisa Twitter-ka, wuxuuna tilmaamay in Hoggaamiyaha W/Kuurya, Kim Jong Un uu isagu caayey, uguna yeeray Duq.

Trump waxa kale oo uu xusay inuusan isaga marnaba ugu yeerin Kim Jong Un inuu yahay Nin Gaaban oo Buuran “Short and fat).

Mid ka mid ah Qoraalladda uu Tweet-gareeyey Madaxweyne Trump waxa uu ku qoray: “Muxuu Kim Jong Un iigu caynayaa Duq, Anigoo aan weligey ugu yeerin isaga Nin gaaban oo buuran?”

Waxa uu intaasi ku daray: Oh, hagaag. Waxan si adag isugu tijaabiyey inaan noqdo Saaxiibkiisa, lagana yaabo inay maalin uun dhici doonto arrintaasi”.

Donald Trump ayaa hadalkan bixiyey, kadib, markii uu ka qeyb galay Shirweynaha Madaxda dalalka ku jira Ururka Iskaashiga Dhaqaalaha ee Aasiya iyo Baasafik ee loo yaqaano APEC.

Madaxweyne Trump waxa uu horey aflagaao iyo cabsi-gelin u jeediyey Hoggaamiyaha W/Kuurya, iyadoo ay taagnayd Xiisadda ka dhalatay Barnaamijka Nukliyeerka iyo Gantaalladda ee dalkaasi.

Waxa uu Trump xilligaasi sheegau inay ka hortegi doonaan Qorshaha W/Kuurya ku doonayaan inay ku soo weeraraan Maraykanka.

Bishii September ee la soo dhaafay, Hoggaamiyaha W/Kuurya waxa uu Donald Trump ku tilmaamay Nin uusan Dhimirkiisa miisaanayn

Hadalkaasi ayaa yimid, kadib, markii uu Trump ku goodiyey inuu burburin doono dalka W/Kuurya oo ay ku nool yihiin 26 milyan oo qof..

Milliteriga dalka W/Kuurya waxay bishii Setember 3-dii ee sannadkan tijaabiyeen  Gantaalkii 6-aad ee Hubka Nukliyeerka.