Ciidamada ammaanka ee Booliska maamulka Hirshabeelle ayaa saaka howlgalo kala duwan ka sameeyay xaafaddo dhowr ah oo ka tirsan Magaalada Baladweyne ee Xarunta Gobolka Hiiraan, kaasi halkaas xalay uu ka dhacay fal dil ah.
Ciidanka ayaa howlgalka intiisa badan ka sameeyay xaafadda howlgawaag ee Baladweyne, kadib markii xalay rag ku hubeysnaa Bastoolado ay ku dileen Nabadoon Caan ahaa oo lagu magacaabi jiray Xasan Ibraahim Nuur (Xasan Tiyeegoow).
Inta uu socday howlgalka ayaa waxaa lagu soo qabtay dad u badan dhalinyaro oo looga shakiyay inay ka dambeeyeen dilkii loo geystay Xasan Tiyeegoow, isla markaana la geeyay Saldhig Booliska, laguna wado baaritaano kala duwan.
Wararka ayaa intaas kusii daraya in howlalka lagu qabtay hub laga soo bixyay Guriga ku yaalla xaafad ka tirsan Magaalada Baladweyne ee Gobolka Hiiraan, kaasi oo ay la wareegeen laamaha amniga.
Sidoo kale waxaa la tilmaamay inuu dhaawac soo gaaray qof kamid ah dadkii howlgalka lagu qabtay, kadib markii uu muran la galay Ciidanka howlalka waday, iyagoona Ciidamada mararka qaarkood kor u ridayay rasaas goos goos ah oo la maqlayay.
Magaalada Baladweyne ee Xarunta gobolka Hiiraan ayaa waxaa horey uga dhacay dilal qorsheysan oo ay geysteen rag dhalinyaro ah oo ku hubeysnaa Basroolado, waxaana xusid mudan in xalay sidoo kale halkaas uu ka dhacay Banaanbax rabashado watay.
