Ciiddamo Ethiopian iyo kuwo loo tababaray Galmudug oo ku wajahan Gal-cad iyo Ceel-dheer.

Wararka aynu ka helayno magaalladda Ceel-buur ayaa waxay sheegayaan inay halkaasi ka ruqaansadeen Ciiddamo Ethiopian iyo kuwo Soomaali ah, kuwaasi oo qorsheynaya inay Alshabaab ka saaraan Deegaanadda ay kaga sugan yihiin Bariga Deexda Galgaduud, gaar ahaan Degmooyinka Gal-cad iyo Ceel-dheer.

Ciiddanka Ethiopianka waxaa la socda Ciiddan Deegaanka oo ay tababareen, kuwaasi oo ku wehlin doona Hawlgalka Alshabaab looga saarayo Labadaasi Degmo.

Sidoo kale, Xeebta Degmadda Cadale ee Gobalka Sh/dhexe waxaa ka socda Dhaqdhaqaaq Ciiddan oo ay wadaan Ciiddanka Dowladda iyo kuwa AMISOM, kuwaasi oo la sheegay inay qeyb ka yihiin Hawlgalka Alshabaab looga saarayo Degmooyinka Ceel-dheer iyo Gal-cad.

Dhinaca kale, Kolonel Maxamuud Koronto oo ahaan jirey Taliyihii Guutadda Koowaad ee Ciiddanka Xoogga Dalka Somalia ee Gobalka Sh/dhexe ayaa ku eedeeyey Madaxtooyadda iyo Wasaaradda Gaashaandhigga inay dayaceen dagaalka lagula jiro Alshabaabka ku sugan qeybo ka mid ah Sh/dhexe ilaa Deexda Bari ee Gobalka Galgaduud.

Sarkaalka oo dhawaan la hadlay Radio Dalsan waxa uu tilmaamay in la dayacay in lala dagaalamo Alshabaab ku sugan qeybo ka mid ah Sh/dhexe ilaa Bariga Galgaduud, iyadoo Ciiddankii u dhashay Deegaanadaasi loo jiheeyo dagaallo ka socda Deegaano kale.

“Maadaama Dowladda ku dhisan tahay 4.5, waa in Ciiddan kasta loo jiheeyaa Deegaanadda ay ka soo kala jeedaan, si aysan u imaanin Habacsanaan iyo Dayacaadda Deegaanadda” ayuu yiri Kolonel Maxamuud Koronto.

Waxa kale oo uu dhaliilay Hawlgalka AMISOM, oo uu xusay inay ka gaabiyeen sidii Alshabaab looga saari lahaa Sh/dhexe oo uu xusay inay muddo 7 sanno haysteen.

Dhinaca kale, Kolonel Koronto Waxa uu carrabka ku adkeeyey inay ka  go’an tahay inay Alshabaab ka saaraan Deegaanadda uu isagu hayb ahaan ka soo jeedo ee Gobalka Sh/dhexe ilaa Degmooyinka Ceel-dheer iyo Meseaga-waa’ ee Bariga Galgaduud, waa sida uu hadalka u yiri.

Waxa uu ugu baaqay dadka ku abtirsada Deegaanadaas ee ku nool gudaha iyo dibedda inay taageero ka geystaan Hawlgalka Alshabaab looga saarayo Sh/dhexe iyo Bariga Galgaduud, waa sida uu hadalka u yiri.

©Radio Dalsan