Askar Kenyaati iyo dagaalyahanno Alshabaab oo is-dilay

Afhayeenka Milliteriga Kenya, Kolonel David Obonyo ayaa sheegay inay Dagaalyahanno Alshabaab iyo Ciiddan ka tirsan Milliteriga Kenya waaberigii hore ee saakayto ku dagaalameen Saldhigga ay ciiddamadu ku leeyihiin Degmadda Baure oo 39 KM dhanka Waqooyi ka xiga Degmadda Baragoni.

Waxa uu tilmaamay in iska horimaadkaasi lagu dilay  11-Dagaalyahan oo ka tirsan Alshabaab, kuwaasi oo labo ka mid ah ka soo jeedaan dalalka la isku yiraahdo Caucasian.

Afhayeenka waxa uu ugu baaqday dadka deegaanka inay Ciiddamadda ku soo wargeliyaan haddii ay arkaan dad u baahan kaalmo daaweyn, isagoo ulajeeday haddii ay Dagaalamayaasha Alshabaab ka dhaawacmay weli ku  sugan yihiin deegaano aan ka dheerayn halkii lagu dagaalamay.

Dhinaca kale, waxa uu tilmaamay inay gacanta ku dhigeen 13 qori nooca AK 47, 5 qoriga RPG iyo 8 bam gacmeed, waa sida uu hadalka u yiri Afhayeenkaasi.

Ma jiraan warar madax bannaan oo xaqiijinaya ama beeninaya sheegashadaasi.

Weerarka Alshabaab waxa uu ku soo beegmayaa iyadoo berrito ku beegan tahay sannad-guuradii koowaad ee ka soo wareegtay markii ay Dagaalamayaasha Alshebaab weerareen Mpeketoni iyo Lamu ee dalka Kenya, laguna dilay ugu yaraan 50-qof.

Xigasho:- The Standardmedia

© Warqabadka Dalsan Radio