Aroornimadii hore ee Saakay ayaa rag loo maleynayo in ay ka tirsan yihiin Al-Shabaab waxa ay weerar ku qaadeen koontoroolka Ciidamada dowladda Soomaaliya ay ku sugan yihiin ee Kalabeyr oo 24km duleedka kaga began Magaalada Baladweyne ee Xarunta Gobolka Hiiraan.
Dagaalka oo socday in ka badan Saacad ayaa la sheegay in ay Al-Shabaab Ciidamadii dowladda ee ku sugnaa kala wareegeen, sida ay xaqiijiyeen qaar ka mid ah dadka deegaanka oo Magacooda iyo codkooda diiday in qalabka Warbaahinta loo adeegsado.
Inta la ogyahay waxaa dagaalka ku geeriyooday afar askari oo ka tirsan ciidamada dowlada halka labo kalena lagu dhaawacay sida ay dadka deegaanka Dalsan u sheegeen.
Lama oga dhankooda khasaaraha ka soo gaaray dagaalkaas Al-Shabaab, waxana warar ay ku qoreen baraha Internet-ka ay ku sheegeen in dagaalkaas lagu dilay 6 Askari sidoo kalena Saanad Milateri ay ku qabsadeen.
Wararkii ugu dambeeyay ayaa waxa ay sheegayaan in hadda halkaasi ay dhaqdhaaqqyo ciidan ay ka wadaan Ciidamada dowladda Soomaaliya kuwaas oo ka tagay Magaalada Baladweyne.
