Hay’adda QM ugu qaabilsan Arrimaha Qaxootiga (UNHCR) ayaa sheegtay inay in ka badan 33-kun oo Qaxooti Soomaali ah ku soo laabteen dalkooda hooyo tan iyo bishii December ee sannadkii 2014-kii.
Warbixin ay Hay’adda UNHCR shalay soo soo saartay ayey ku faahfaahisay Taageeradda ay u fidiyaan Qaxootiga Soomaalida ee iskoodau go’ansada inay isaga soo hayaamaan Xeradda Dhadhaab ee W/bari Kenya.
Warbixinta waxaa kaloo lagu xusay in sannadkan oo kaliya dib u soo laabteen 27,077 Qaxooti Somali ah.
Dhinaca kale, Warbixinta Hay’adda UNHCR waxaa lagu xusay inay ku-dhawaad 517 Qaxooti isku diiwaan geliyeen labadii Isbuuc ee la soo dhaafay sidii Diyaarado loogu soo daad-gureyn lahaa.
UNHCR waxay xustay inay dib bilaabeen Duullimaadyadda Diyaaradaha lagu soo daabulayo Qaxootiga doonaya inay tagaan magaallooyinka Muqdisho, Baydhabo iyo Kismaayo.
Labo Duullimaad ayaa la filayaa inay isbuuc kasta Qaxootiga ka dejiyaan magaalladda Kismaayo, waxaana suurto-gal ah in la sii kordhiyo, sida lagu xusay Warbixinta Hay’adda QM ugu qaabilsan Arrimaha Qaxootiga (UNHCR).
Dhinaca kale, Qaxootiga la soo marsiin jirey dhulka ayaa la joojiyey bishi August 30-dii, kadib, markii ay Maamul-gobaleedka Jubbaland sheegeen inaysan qaabili Karin tiro badan oo ka mid ah dadka soo laabanayo.
Tallaabadda lagu dedejinayo Qaxootiga Soomaalida ee iskooda uga soo laabanayo Xeradda Dhadhaab ayaa timid, iyadoo Dowladda Kenya sheegtay inay Xeradaasi xiri doonaan bisha soo socota ee November 30-da, inkastoo ay Hay’addaha Caalamiga walaac xooggan ka muujiyeen Arrintaasi.
In ka badan 300,000 oo Qaxooti u badan Somali ayaa ku nool Xeradda Dhadhaab oo ah Xeradda ugu ballaaran ee Qaxootiga ee ka jira Caalamka.
©Radio Dalsan
