Ukraine ayaa sheegtay inay guul weyn ka gaartay weerarkii ugu weynaa uguna fogaa ee ay ka fuliso gudaha Ruushka tan iyo markii uu billowday duullaanka lagu qaaday dalkeeda sannadkii 2022. Weerarkan oo la sheegay inuu ahaa mid si weyn loo qorsheeyey ayaa lagu bartilmaameedsaday afar saldhig militari oo Ruushka leeyahay.
Madaxweynaha Ukraine, Volodymyr Zelensky, ayaa sheegay in weerarkan oo loo adeegsaday 117 diyaaradood oo aan duuliye lahayn (drone) uu sababay burbur weyn oo gaaray saldhigyada ciidamada cirka ee Ruushka. Sida uu sheegay, ilaa 40 diyaaradood oo ah kuwa weerarrada meelaha fog laga geysto ayaa lagu burburiyey hawlgalkan.
Zelensky ayaa xusay in howlgalka, oo lagu magacaabay ‘Xuubka Caarada’, ay si qarsoodi ah u fuliyeen ciidamada sirdoonka ee SBU. Wuxuu intaas ku daray in la burburiyey 34% diyaaradaha Ruushka ee xambaara gantaallada ridada dheer ee nooca “strategic cruise missile”.
Ilo ku dhow sirdoonka Ukraine ayaa warbaahinta u sheegay in diyaarinta hawlgalkan ay qaadatay hal sano iyo bar. Diyaaradaha drone-ka ayaa la geliyey gudaha Ruushka iyadoo lagu dhuumanayey sanaadiiq alwaax ah, waxaana lagu qariyey goobo u dhow bartilmaameedyada, ka hor inta aan si isku dubbaridan loo weerarin saldhigyada laga soo abaabulo duqeymaha cirka.
Dhinaca kale, dowladda Ruushka ayaa xaqiijisay in weerarro lagu qaaday shan gobol oo ka tirsan dalkaas, waxayna ku tilmaantay dhacdadan mid “argagixisanimo ah”.
