Warar laga helayo gobolka Galgaduud ayaa xaqiijinaya in weerar hubeysan oo xalay ka dhacay deegaanka Ceelasha, oo u dhexeeya magaalooyinka Caabudwaaq iyo Balanbale, lagu dilay Sade Daahir Caanood Gulaafe, taliyihii hore ee ilaaladii khaaska ahayd ee Madaxweyne ku-xigeenka Galmudug.
Sade Daahir ayaa la socday gaari ay saarnaayeen dad kale, xilli ay koox hubeysan ku beegsadeen meel aan ka fogeyn Ceelasha. Weerarka ayaa sababay dhimashada Sade Daahir iyo dhaawac culus oo soo gaaray mid kamid ah rakaabkii la socday, kaasoo si degdeg ah loogu qaaday isbitaalka degmada Caabudwaaq.
Goobjoogayaal ayaa sheegay in dableyda weerarka geysatay ay si degdeg ah uga baxsadeen goobta. Inkastoo aan la ogeyn cidda ka dambeysay, haddana wararka hordhaca ah ayaa muujinaya in weerarka uu salka ku hayo aano qabiil oo muddooyinkii dambe ka taagneyd deegaannada Galmudug, gaar ahaan agagaarka Caabudwaaq iyo Balanbale.
Xaaladda ayaa sii cakirmatay kadib markii la xaqiijiyay dil kale oo dhacay daqiiqado kadib, kaasoo loo geystay Bashiir Cabdiqaadir Cali.
Dilkan labaad ayaa loo arkaa fal aargudasho ah, taasoo sii hurisay xiisaddii ka jirtay gobolka, isla markaana kicisay cabsi laga qabo dagaallo qabiil oo baahda.
Maamulka Galmudug ayaa cambaareeyay dilalkan, isagoo sheegay in ciidamada ammaanku ay bilaabeen baaritaanno iyo hawlgallo lagu raadinayo dambiilayaasha.
Sidoo kale, waxaa soconaya dadaallo lagu dhex-dhexaadinayo beelaha, si looga hortago dhiig dambe oo daata.
Gobolka Galgaduud ayaa dhowrkii bil ee la soo dhaafay wajahayay xaalado amni darro oo isugu jira weerarro Al-Shabaab iyo dagaallo salka ku haya aanooyin qabiil, kuwaasoo caqabad ku ah dadaallada nabadeed ee ka socda Galmudug.
Dilkan lagu khaarijiyay Sade Daahir Caanood, oo ahaa shaqsi xil sare kasoo qabtay ammaanka Galmudug, ayaa naxdin ku reebay mas’uuliyiinta maamulka, waxaana uu sare u qaaday walaaca laga qabo in milatariyo beeleedyo ay si xooggan ugu milmaan amniga deegaanka.
