Taliyihii hore ee Booliska Soomaaliyeed, Sulub Axmed Fidhin, oo xilka laga qaaday, ayaa helay dallacsiin sare ka hor inta aan xilka laga qaadin, waxaana loo magacaabay Wasiir Ku-Xigeenka Wasaaradda Gaadiidka iyo Duulista Hawada ee Xukuumadda Jamhuuriyadda Federaalka Soomaaliya (XJFS). Magacaabistan cusub waxaa ku dhawaaqay Ra’iisul Wasaaraha Xukuumadda, Mudane Xamse Cabdi Barre, oo ku tilmaamay tallaabo muhiim ah oo lagu xoojinayo hoggaanka Wasaaradda Gaadiidka iyo Duulista.
Sulub Axmed Fidhin, oo muddo ku dhow sanad soo hayay xilka Taliyaha Ciidanka Booliska, ayaa intii uu xilka hayay ku guuleystay inuu horumar ballaaran ka sameeyo tayada booliska iyo la dagaallanka argagixisada, gaar ahaan kooxaha Al-Shabaab. Wuxuu ahaa hoggaamiye isku howlay inuu sare u qaado awoodda ciidanka booliska, isaga oo dadaal xooggan ku bixiyay in la helo nidaam amni oo casri ah oo ka jawaaba baahiyaha amni ee ka jira dalka.
Magacaabista cusub ee Sulub, ka hor inta aan xilka laga wareejin, waxay muujinaysaa kalsoonida ay Xukuumadda Federaalka ku qabto waayo-aragnimadiisa iyo awooddiisa hoggaamineed. Tani waxay u oggolaan doontaa Sulub inuu waaya-aragnimadiisa ciidamada uu ka faa’iideeyo hay’adda muhiimka ah ee Gaadiidka iyo Duulista Hawada, taas oo laf-dhabar u ah isku socodka iyo kobcinta dhaqaalaha dalka.
Dhanka kale, xilka Taliyaha Booliska Soomaaliyeed waxaa loo magacaabay Generaal Asad Cismaan Cabdullaahi (Asad Diyaano), oo isna ah sarkaal leh khibrad badan oo dhinaca amniga ah. Generaal Asad ayaa ka soo shaqeeyay Ciidanka PSF ee Puntland, waxaana laga filayaa inuu hal-abuur cusub ku soo kordhiyo hoggaaminta Ciidanka Booliska Soomaaliyeed.
