Sida lagu soo daabacay Wargeyska Yoom Sabca ee ka soo baxa magaalladda Qaahira, waxay Ciiddanka Badda ee dalka Msaar soo badbaadiyeen 31 Muhaajiriin ay ku jireen kuwo Somali ah, kuwaasi oo ay doonidii ay la socdeen ku degtay Xeebta Degmadda Beheyra, kuna dhow Badda Mediterraneanka.
Wargeysku waxa uu qoray inay maydadka saddex qof oo kala ah nin, haweeney iyo cunug yar oo la rumeysan yahay inay Somali yihiin laga soo saaro halka ay doonida ku degtay.
Tahriibayaasha lagu qabtay Xeebaha dalka Masar ayaa waxay ka soo kala jeedaan dalalka Somali, Sudan, Syria, Eritrea iyo Naakhuudihii doonta oo Masaari ahaa, waxaana la sheegay in dadka loo gudbiyey Xabsiga Dhexe ee Qaahira.
Ilaaladda Xeebaha ee dalka Masar waxay dhowr jeer fashiliyeen ama soo qabteen Tahriibayaal badankooda ah Somali, Sudan iyo Masaari, kuwaasi oo toddobaad kasta isku daya inay si sharci-darro ah ugu gudbaan Galbeedka Lama-degaanka dalka Libya, kadibna ay ugu sii tahriibaan Xeebaha Talyaaniga.
Wasaaradda Arrimaha Dibedda ee dalka Msaar oo bishii hore ee April 23-dii ilaa 24-dii qabanqaabisay Shir Caalami ah oo ka dhacay magaalladda loo dalxiis tago ee Sharma-sheekh ayaa waxay Dowladda Masar ugu baaqeen Dowladaha ku bahoobay Ururka Midowga Europe “EU”-da in tallaabo mideysan laga qaato sidii loo joojin lahaa qulqulka Tahriibayaasha ku le’anayo Badda Mediterreanka.
Dhinaca kale, Sharci qabyo ah oo looga hortagayo Tahriibayaasha ayaa dhawaan loo gudbin doonaa Golaha Wasiiradda ee Xukuumadda Masar si ay u ansixiyaan.
Sharcigaas qabyadda ah ayaa waxa uu dhigayaa in qofkii lagu qabto Tahriib lagu xukumi doono xabsi u dhexeeya 10 sanno ilaa 20-sanno.
