Sii-hayaha xilka Ra’iisul Wasaaraha Xukuumadda Soomaaliya Maxamed Xuseen Rooble ayaa ka hadlay geeridii ku timid Xildhibaan Maxamed Maxamuud Boonow oo ka tirsanaa Golaha Shacabka Baarlamaanka Federaalka.
Ra’iisul Wasaare ayaa tacsi u diray Qoyskiisa, Asxaabtiisa iyo dhammaan ummadda Soomaaliyeed ee uu ka baxay Maxamed Maxamuud oo saakay ku dhintay Magaalada Baydhabo ee Xarunta Gobolka Baay.
Rooble ayaa Alle uga baryay Marxuumka inuu naxariistii Jano Alle ugu deeqo, Qaraabadiisana Samir iyo iimaan Alle ka siiyo, waxaana sidoo kale ka tacsiyeeyay geerida Xildhibaanka, Guddoomiyaha Golaha Shacabka Maxamed Mursal.
Allaha u naxariistee Xildhibaanka Maxamuud Boonow ayaa waxaa uu sidoo kale ahaa Wasiiru dowlihii Wasaaradda amniga Gudaha Xukuumaddii Ra’iisul Wasaarihii hore ee dalka Xasan Cali Kheyre.
Waxaa uu golaha shacabka ka tirsanaa tan iyo 2012, waxaa uu Wasiir ka soo noqday dowladdii Shariif Sheekh Axmed ee KMG aheyd. Eng. Maxamed Maxamauud Boonow ka sokow siyaasadda waxaa uu ahaa ganacsade si weyn looga yaqaano degaanada Koofur Galbeed.
