Shirka Golaha Wadatashiga Qaran ee Madaxda dowladda Federaalka Soomaaliya iyo kuwa maamul Goboleedyada dalka ayaa goor dhow ka furmay Xarunta Madaxtooyada kaasioo uu shir guddoominayo Madaxweynaha dowladda Xasan Sheekh Maxamuud.
Shirkaan oo uu madaxda maamul Goboleedyada isugu yeeray Madaxweyne Xasan Sheekh ayaa waxaa looga hadlayaa arrimo kala duwan oo kamid yihiin xaaladda abaaraha jira, amniga, siyaasadda, la dagaalanka Al-shabaab iyo sidii loo xjoojinta lahaa wadashaqeynta maamul Goboleedyada iyo dowladda Federaalka.
Ra’iisul Wasaare Xamse Cabdi Barre, Madaxda Hirshabeelle, Galmudug, Koonfur Galbeed iyo Jubbaland ayaa shirka goobjoog ka ah, waxaana ka maqan oo kaliya Madaxweynaha Puntland Saciid Cabdullaahi Deni oo shirka ZOOM uga qeyb galaya.
Warar la helayo ayaa waxaa ay sheegayaan in Shirka Golaha Wadatashiga Qaran uu socon doono muddo laba maalmood ah, isla markaana Madaxda ka qeyb galeysa ay dood adeg ku yeelan doonaa Shirka inta uu socdo.
Shirkaan ayaa daba socdo kulankii fashilmay ee ay gudaha Muqdisho ku yeesheen Wasiirka maaliyadda dowladda dhexe iyo Wasiirada maaliyadda dowlad goboleedyada dalka, kaas oo ugu dambeyn lagu kala kacay, kadib markii Wasiirada ay heshiin waayeen.
