Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, ayaa ku dhawaaqay in magaca laga bedelay Wasaaradda Awqaafta iyo Arrimaha Diinta, taas oo hadda loo bixiyey “Wasaaradda Awqaafta iyo Arrimaha Islaamka.” Go’aankan ayaa ku yimid digreeto rasmi ah oo kasoo baxday xafiiska Ra’iisul Wasaaraha, taas oo qeyb ka ah dib-u-habeynta iyo casriyeynta hay’adaha dowladda.
Talaabadan ayaa ujeedkeedu yahay in lagu xoojiyo doorka Wasaaradda ee ku aaddan arrimaha diinta iyo adeegyada bulshadu ka filato, iyadoo lagu saleeyay baahida loo qabo in Wasaaraddaasi si toos ah ugu adeegsato magaca “Islaamka” si loo xoojiyo fahamka iyo ka shaqeynta adeegyada diimeed ee bulshada Soomaaliyeed.
Go’aankan ayaa la filayaa in uu noqdo tallaabo lagu hagaajinayo shaqada wasaaradda, laguna kobcinayo xiriirka ay la leedahay hay’adaha diinta, culimada, iyo bulshada Soomaaliyeed ee ay u adeegto.
