Ra’iisul Wasaarihii hore ee Soomaaliya Xasan Cali Kheyre iyo Cumar Cabdirashiid Cali Sharmaarke ayaa xalay kulammo gaar-gaar ah kula yeeshay magaalada Muqdisho xildhibaanno iyo dhalinyaro Soomaaliyeed. Kulamadan ayaa qayb ka ah dadaallada socda ee lagu gorfeynayo xaaladda siyaasadeed ee dalka.
Kulammada oo dhacay habeenkii xalay ayaa loo arkaa kuwo hordhac u ah shir ballaaran oo la filayo in toddobaadkan ay yeeshaan siyaasiyiinta mucaaradka, kaas oo lagu falanqeyn doono xaaladda cakiran ee dalka, gaar ahaan arrimaha doorashooyinka iyo jihada siyaasadeed ee mustaqbalka.
Madaxda mucaaradka ayaa kulammadaasi si qoto dheer ugaga hadlay caqabadaha taagan, iyaga oo muujiyay muhiimadda ay leedahay in la helo xal waara oo ka turjumaya rabitaanka shacabka Soomaaliyeed. Waxa kale oo la xusay in shirarkaasi ay horseedi karaan mideynta mowqifyada siyaasadeed ee dhinacyada mucaaradka.
Shir weyn oo la filayo in uu dhawaan ka dhaco caasimadda Muqdisho ayaa noqon doona fursad muhiim ah oo lagu adkeynayo isku-duubnida siyaasiyiinta mucaaradka, xilli ay socdaan dadaallo diblomaasiyadeed iyo kulamo hoose oo ay hormuud u yihiin hoggaamiyeyaashii hore ee dalka.
Magaalada Muqdisho ayaa markale isu beddeshay xarun siyaasadeed oo kulmaysa aragtiyaha kala duwan, waxaana la saadaalinayaa in maalmaha soo socda ay sii kordhaan kulammada iyo isu-imaadyada siyaasadeed ee heer qaran.
