Ra’iisul Wasaaraha Soomaaliya, Xamse Cabdi Barre, oo maalmihii la soo dhaafay ku sugnaa magaalada Baydhaba, xarunta ku meel gaarka ah ee maamulka Koonfur Galbeed, ayaa ku guuleystay inuu xalliyo khilaaf soo kala dhex galay dowladda federaalka iyo hoggaanka maamulka Koonfur Galbeed. Khilaafkaasi ayaa inta badan salka ku hayay arrimo la xiriira awood qaybsi, siyaasadda gudaha, iyo maamulka Koonfur Galbeed, oo ay soo baxayeen warar ku saabsan in uu jiro isfahan la’aan u dhaxaysay Villa Somalia iyo hoggaanka Koonfur Galbeed, gaar ahaan Madaxweynaha maamulkaas, Cabdicasiis Lafta Gareen.
Wadahadallada uu hoggaaminayey Ra’iisul Wasaare Xamse ayaa lagu tilmaamay kuwo miro dhal ah, isagoo si dhow ula taliyay labada dhinac, gaar ahaan dhinacyada la kala safan madaxweynaha Koonfur Galbeed iyo siyaasiyiin mucaarad ku ahaa hab dhaqanka Villa Somalia ee maamulka Koonfur Galbeed. Wadahadalladan waxay suurto gashay in la gaadho isfaham cusub, iyadoo la isku afgartay in khilaafka lagu xalliyo qaab wada-hadal ah oo aan dagaal siyaasadeed ama kala fogaansho horseedin.
Ra’iisul Wasaaraha ayaa sidoo kale ku baaqay in dib u habeyn lagu sameeyo wada-shaqeynta labada dhinac si loo adkeeyo xiriirka dowladda dhexe iyo maamul goboleedyada, taas oo xoojineysa midnimada iyo wadajirka qaranka Soomaaliyeed, gaar ahaan marka la eego dagaalka lagula jiro Al-Shabaab iyo khatarta kale ee amni.
