Wararka aan ka heleyno degmada Luuq ee Gobolka Gedo ee Koonfurta Soomaaliya ayaa waxa ay sheegayaan in barqanimadii Maanta halkaasi uu ka dhacay qarax miino nooca dhulka lagu aaso ah ee laga hago Remote Controol-ka, kaasi oo geystay khasaaro.
Dad ku sugan Luuq ayaa kusoo warramay in qaraxa oo ahaa mid xooggan oo jugtiisa laga maqlay inta badan xaafadaha degmada uu si gaar ah uga dhacay goob maqaayad ah, halkaasi oo sida la sheegay lagu aasay qaraxa miinada ahaa.
Inta la xaqiijiyay sadex qof oo shacab ah ayaa ku dhaawacmay qaraxaasi Maanta ka dhacay degmada Luuq ee Gobolka Gedo, qaraxa kadib ayaa waxaa rasaas furay ciidanka ammaanka degmada oo durbadii tagay goobta, isla markaana xiray aaga uu qaraxu dhacay.
Isgaarsiinta magaalada oo markii hore hawada laga saaray ayaa dib usoo laabatay, saraakiisha ammaanka Luuq ayaa sheegay inay wadaan baaritaano ku aadan qaraxa, ayna ku daba jiraan soo qabashada dadkii ka danbeeyay qaraxaasi khasaaraha geystay.
