Xafiiska Qaramada Midoobay ee Soomaaliya ayaa War kasoo saaray Go’aankii Maanta ee Xildhibaanada Golaha Shacabka ay dib uga laabteen muddo kordhintii Farmaajo ee labada sano, ayna ogolaadeen in dib loogu noqdo heshiiskii17-kii Sebteembar.
Qoraal kasoo baxay Xafiiska UN-ka ee Muqdisho ayaa waxaa lagu soo dhaweeyay Go’aankii Golaha Shacabka ee dib loogu soo celiyey heshiiskii doorashada ee 17-kii Sebteembar, kadib codsiga Madaxweyne Maxamed Cabdullaahi Farmaajo.
Qaramada Midoobay ayaa Madaxda dowladda Federaalka iyo kuwa dowlad Goboleedyada ugu baaqday inay dib ugu laabtaan wadahadalka, isla markaana ay u diyaar garooban qabashada doorashooyinka dalka.
“Bahda Qaramada Midoobay ee Soomaaliya waxa ay soo dhoweyneysaa go’aanka baarlamaanka Federaalka ee dib loogu soo celiyey heshiiskii doorashada ee 17-kii Sebteembar, kadib codsiga madaxweyne Maxamed Cabdullaahi Farmaajo. QM waxa ay ugu baaqeysaa madaxda Soomaalida in ay dib ugu laabtaan wadahadalka oo ay u diyaar-garoobaan doorashooyinka dib u dhac la’aan” ayaa lagu yiri Qoraalka UN-ka.
Sidoo kale Xafiiska Qaramada Midoobay ee Soomaaliya ayaa soo dhaweeyay tallaabadii Madaxweynaha muddo xileedkiisa dhammaaday Farmaajo uu doorashada iyo amniga ugu wareejiyay Ra’iisul Wasaare Maxamed Xuseen Rooble.
Si kastaba Xildhibaanada Golaha Shacabka ayaa dib uga laabtay Go’aankii muddo kordhinta, iyagoona dib u soo celiyay heshiiskii doorashada ee 17-kii Sebteembar, kadib markii Madaxweyne Farmaajo uu dalbaday in dib looga laabto Go’aankii muddo kororsiga.
