Allaha u naxariistee Meydka Guddoomiyihii Gobolka Banaadir ahaana Duqii Muqdisho Cabdiraxmaan Cumar Cismaan Eng.Yariisow ayaa Maanta oo Axad ah lagu wadaa in laga soo dejiyo Garoonka Diyaaradaha Aadan Cadde Muqdisho,kadib markii shalay uu dib u dhac uu yimid keenistiisa.
Guddiga qabanqaabada Aaska Eng. Yariisow ayaa sheegay in Maanta 8:00 barqanimo Meydka la keeni doono Muqdisho,isla markaana waxaa Caasimadda ka socda qaban qaabada Aaskiisa.
Madaxda ugu sareeysa dowladda Soomaaliya ayaa ka qeyb geli doona Aaska Guddoomiyihii Gobolka Banaadir ahaana Duqii Muqdisho oo u geeriyooday dhaawac Culus oo kasoo gaaray qaraxii 24-ka Bishii la soo dhaafay ka dhacay Xarunta maamulka Gobolka Banaadir xili uu socday Shir looga hadlayay amniga Caasimadda.
Shalay ayaa lagu waday in Aas qaran Magaalada Muqdisho loogu sameeyo Guddoomiyihii Gobolka Banaadir ahaana Duqii Muqdisho Cabdiraxmaan Cumar Cismaan Eng.Yariisow,hayeeshee dib u dhac uu ayaa ku yimid, taas oo loo sababaynayo cillad farsamo oo ku timid Diyaaraddaii soo qaadi lahayd Meydka marxuumka.
Ammaanka guud ee Magaalada Muqdisho ayaa Maanta siweyn loo adkeeyay,waxaana la xiray inta badan Wadooyinka Magaalada,iyadoona ay ku sugan yihiin Ciidamo ka tirsan kuwa Booliska Dowladda.
