Magaalada Garoowe ee Caasimadda maamulka Puntland ayaa waxaa ka socda diyaar garoon ku aadan Shirweynaha wadatashiga Puntland ee uu Iclaamiyay Madaxweyne Saciid Cabdullaahi Deni, kaasi oo maalinta beri ah furmaya.
Shirka ayaa waxaa ka qeyb galaya Madaxweyneyaashii hore ee Puntland, Xildhibaano, Wasiiro ka tirsan Xukuumadda Dowladda Federaalka kana soo jeeda Puntland iyo xubno kale oo lagu Casuumay Shirkaas oo ah mid siweyn loo hadal haayo.
Magaalada Garoowe ayaa waxaa saacadihii lasoo dhaafay kulamo ku yeeshay Mas’uuliyiin ka tirsan Puntland iyo wafdi isugu jiray Wasiiro iyo Xildhibaano ka tirsan dowladda, kuwaasi oo shalay halkaas gaaray.
Warar la helao ayaa waxaa ay sheegayaan in Shirka Wadatashiga ah looga hadli doono Arrimo kala duwan oo ay kamid yihiin Aayaha Maamulka Puntlland, Khilaafka u dhexeeya dowladda Federaalka iyo maamulkaas iyo qodobo kale.
Madaxweyne Saciid Cabullaahi Deni ayaa la filayaa in Shirkaas uu maalinta berri ah uu si rasmi ah u furo, isagoona jeedin doona Khudbad uu uga hadli doono Arrimo kala duwan oo aadan Khilaafka dowladda Federaalka iyo maamulka Puntland.
Dhinaca kale Ciidamo farabadan oo ka tirsan kuwa amniga Puntland ayaa la dhigay Wadooyinka waaweyn ee Magaalada Garoowe, kuwaasi oo sugaya amniga, siddoo kalena baaritaano ku sameeynaya gaadiidka noocyadiisa kala duwan.
Si kastaba Ammaanka guud ee Garoowe ayaa siweyn loo adkeeyay, waxaana sida uu qorshahu yahay lagu wadaa in berri ah oo Axad ah halkaas uu furmo shirweyne uu horey u Iclaamiyay Madaxweyne Saciid Cabdullaahi Deni.
