Maamul Goboleedka Puntland ayaa ka hadlay shirka la filayo in mar kale dib ay isugu soo laabtaan Madaxda dowladda Federaalka iyo Dowlad Goboleedyada dalka, maaddaama uu horay u fashilmay shirkii Afisyooni ee Madaxda dhexmaray.
Puntland ayaa shuruud adag ku xiray in ay ka qayb galaan shir dambe lagu qabto Magaalada Muqdisho, kaasi oo xal loogu raadinayo khilaafka taagan ee dhanka Doorashooyinka ee dalka ka dhici doono, kuwaasi hadda la isku mari la’ayahay.
Wasiirka Warfaafinta Puntland Cabdullaahi Cali Xirsi Timacadde ayaa sheegey in aysan Muqdisho danbe tegeyn, isla markaana aanayn ka qeyb geli doonin Shir uu Madaxweynaha muddo xileedkiisa dhammaaday Farmaajo isugu yeero Madaxda.
Sidoo kale Wasiirka ayaa caddeeyay inay ka qeyb geli doonaan oo kaliya shirar looga hadlayo khilaafka doorashada dalka markii ay Beesha Caalamka ku casuunto ka qeyb galka shirkaas, hayeeshee aysan Muqdisho iska imaan doonin.
Hadalka Wasiirka Warfaafinta Puntland ayaa imaanaya, iyadoo maamul Goboledyada oo idil ay kasoo hor jeesteen muddo kororsiga Farmaajo, waxaana Mowqifkooda si rasmi ah u caddeeyay Galmudug, Hirshabeelle iyo Koonfur Galbeed, kuwaasi oo ka hor yimid muddo kordhinta, waxaana ku taageeray Ra’iisul Wasaare Maxamed Xuseen Rooble.
