Hadal ka soo baxay Baarayaasha Boliska ayaa sheegay inay shalay qabteen Nin lala xiriirinayo inuu dab qabasiiyey Masjid ku yaalla Gobalka Florida, isla markaana uu qoraalo Islaam-nacayb ah ku faafiyey Warbaahinta ay Bulshadda ku wada xiriiraan.
Ninkaasi oo lagu magacaabo JoseSheriber oo 32 jir ayaa muteysan kara Xabsi 30 sanno, haddii lagu caddeeyo dabka uu ku weeraray Masjiska maalintii Isniinta ee la soo dhaafay oo ku beegnayd maalintii ugu horreysay ee Dabaaldegga Munaasabadda Ciiddul Adxaha.
Boliska waxay sheegeen inay ninkaasi shalay qabteen, kadib, markii ay Boliska gacan ka heleen dadka Deegaanka oo u far muuqay Ninkaasi oo dhex lugeynayey meel aan ka fogeyn Masjidka uu weeraray.
Dhinaca kale, Boliska New York ayaa baaraya Fal Islaam-nacayb ah oo Haweeney Muslimad oo dab la qabadsiiyey.
Hadal ka soo baxay Boliska ayaa lagu sheegay inay badbadaaday Haweeneydaasi oo lagu weeraray iyadoo ka dukaamaysanayso goobaha ganacsiga ee ku yaalla bartamaha Manhattan ee magaalladda New York.
Boliska waxay sheegeen inaysan Weerarkaasi u arkin mid ku dhisan Islaam Nacayb, iyadoo kooxda weerarka geystay u hanjabeen 3 haween oo aan wadanin Labiska Haweenka Muslimiinta.
©Radio Dalsan
