Madaxweynaha Jamhuuriyadda Federaalka Soomaaliya Xasan Sheekh Maxamuud ayaa ka hadlay dagaal xoogan oo Ciidanka dowladda Federaalka iyo Al-shabaab ku dhexmaray deegaan hoostega Magaalada Marka ee Xarunta Gobolka Shabeellaha Hoose.
Madaxweyne Xasan Sheekh ayaa waxaa uu sheegay in dagaal ka dhacay degaanka Jilib Marka oo hoostega degmadaas Al-shabaab lagu gaarsiiyey khasaaro badan, isla markaana looga dilay xubno dhowr ah, in kastoo uusan tirro shaacin Madaxweynaha.
Madaxweyne Xasan Sheekh Maxamuud ayaa waxaa uu uu hadalkiisa intaas kusii daray, xilli uu khudbad ka jeediyey shalay masjidka Shuhadaa ee ku dhex-yaala Madaxtooyada inay sii socon doonaan howlgalada lagu beegsanayo Al-shabaab, waa sida uu hadalka u dhigay .
Madaxweynaha faah faahin intaasi ka badan ma uusan ka bixin dagaalka deegaanka Jilib Marka ee hoostega degmadaas Marka ee Gobolka Shabeellaha Hoose ku dhexmaray Ciidanka dowladda Federaalka Soomaaliya iyo dagaalamayaasha Al-shabaab.
Dhinaca kalena, Madaxweynaha ayaa ka hadlay amni darrada ka jirta Magaalada Muqdisho gaar ahaan dhaca baahsan ee muddooyinkii dambe kusoo batay Muqdisho, wuxuuna shacabka ugu baaqay inay wadashaqeyn la yeeshaan laamaha amniga.
Hadalkan Madaxweyne Xasan Sheekh ee ku aadan in Al-shabaab dagaalyahano looga dilay dagaalkii degaanka Jilib Marka ayaa waxaa uu kusoo beegmay, iyada oo maalmo kahor Al-shabaab qarax ku dishay Guddoomiyihii degmadaas Cabdullaahi Cali Axmed Waafow iyo qaar kamid ahaa ilaaladiisa .
