Maxkamadda darajada Koowaad ee Ciidamada Qalabka Sida qeyta 27-aad ayaa u fariisatay dhageysiga kiiska Gabar dhalinyaro oo dhawaan fal isugu jiray kufsi iyo dil loogu geystay Degmada Balad-xaawo ee Gobolka Gedo.
Saddex eedeysane oo ka tirsan Ciidanka dowladda Federaalka ayaa la horgeeyay Maxkamadda Ciidamada, iyadoo la bilaabay dhageysiga eeda loo heysto oo ah inay kufsi iyo dil u geysteen Gabadha lagu magacaabi jiray Ismahaan Bakaal Maxamed.
Ku-xigeenka Xeer ilaaliyaha Maxkamadda qeyta 27-aad Maxamed C/qaadir Maxamed ayaa Maxkamadda horgeeyay caddeymo kala duwan oo la xiriira sida uu u dhacay falka loo geystay Ismahaan, waxaana cadeymaha ku jiray qoriga dilka lagu geystay.
Sidoo kale Gaashaanle Maxamed C/qaadir Maxamed ayaa Maxkamadda ka dalbaday in saddex eedeysane oo lagu kala magacaabo Nuur Aadan Rashiid, Maxamed Maxamuud Buule iyo Salaad Xareed Cali lagu fuliyo xukuno kala duwan.
Ugu dambeyn Guddoomiyaha Maxkamadda Ciidamada Qalabka Sida qeyta 27-aad Maxamed Amiin Cabdulle oo markii horey furay fadhiga Maxkamadeynta raggaas ayaa soo xiray Maxkamadda, isagoona sheegay in Go’aan laga gaari doono kiiska Ismahaan.
Howlka ay ka socotay dhageysiga Maxkamdeynta ragga kufsiga iyo dilka u geystay Marxuumad Ismahaan Bakaal ayaa waxaa goobjoog ka ahaa Eheladeeda, Saraakiil Ciidan iyo qeybaha kala duwan ee Bulshada.
