Maxkamadda Ciidamada Qalabka Sida ayaa Maanta oo Isniin ah bilowday dhageysiga kiiska Nin lagu eedeeyay inuu la shaqeynayay Al-shabaab, uuna ka howlgalayay Degmada Balad-xaawo ee Gobolka Gedo.
Farxaan Maxamuud Xasan oo ah Nin lagu eedeeyay la shaqeynta Al-shabaab ayaa kal horey isku soo dhiibay Ciidanka dowladda Federaalka ee ku sugan Balad-xaawo, isagoo xiligaas kasoo goostay Shabaab uu kamid ahaa.
Ciidamo dharcad ah ayaa la tilmaamay inay soo ogaadeen fariimo uu eedeysane Farxaan Maxamuud la wadaagay Al-shabaab, kuwaasi oo ku aadan habka ay u shaqeynayan Ciidanka dowladda Federaalka.
Xeer ilaaliyada guud ee Ciidamada C/llaahi Buule Kameey ayaa Maxkamadda kahor sheegay in eedeysane Farxaan Maxamuud uu ka tirsan Al-shabaab, isagoona ku tilmaamay inuu ahaa laba wejiile, wuxuuna Maxkamadda ka dalbaday in cadaaladab la marsiiyo eedeysanaha.
Ugu dambeyn Guddoomiyaha Maxkamadda Ciidamada G/Sare Xasan Cali Nuur Shuute oo ku sugan Degmada Balad-xaawo ee Gobolka Gedo ayaa sheegay in Maxkamadda ay Go’aan kasoo saari doonto kiiska loo heysto Farxaan oo horey isugu dhiibay Ciidanka dowladda.
