Guddiga Arrimaha Dibadda ee Mareykanka, oo sidoo kale loo yaqaan Senatka, ayaa ka digay kharashka sii kordhaya ee ka baxa dagaalka lagula jiro ururka Al-Shabaab, isagoo sheegay in horumarka laga gaarayo dagaalka uu yahay mid gaabis ah.
War-saxaafadeed kasoo baxay guddiga ayaa lagu sheegay in Mareykanku uu bixiyay dhaqaale badan, inkastoo horumarka dagaalka aan la arag si la rabay.
Qaraarka Golaha Ammaanka ee Qaramada Midoobay ee tiradiisu tahay 2719, ayaa lagu sheegay in aan loo isticmaalin maalgelinta Hawlgalka Midowga Afrika ee Soomaaliya (AUSSOM). Guddigu wuxuu ka digay in arrintan ay Mareykanka ku qasbi doonto inuu sii wado maalgelin joogto ah, taasoo culays weyn ku noqonaysa canshuur-bixiyayaasha Mareykanka.
Sida lagu sheegay war-saxaafadeedka, Mareykanku wuxuu soo jeediyay in Midowga Yurub uu la shaqeeyo Madaxweyne Donald Trump si loo helo xalka dhabta ah ee maalgelinta hawlgalka. Guddiga ayaa sidoo kale ku boorriyay Midowga Afrika iyo Qaramada Midoobay inay xoogga saaraan hirgelinta dib-u-habeynta lagama maarmaanka ah ee taageerada nabad ilaalinta iyo dagaalka ka dhanka ah Al-Shabaab.
Mareykanka ayaa si weyn uga walaacsan kharashka sii kordhaya ee ka baxaya dagaalka Al-Shabaab, iyadoo xukuumadda Mareykanka ay ka codsanayso beesha caalamka inay qeyb ka noqoto maalgelinta dadaallada nabad ilaalinta ee Soomaaliya.
