Dhageyso:-Soomaalida ku nool Jamhuuriyadda Airland oo dhibaato ku qaba helida Baasaboorka Soomaaliga baaqna u diray dowladda

Waxaa cabasho ballaaran ay ka soo yeereysaa Jaaliyadda Soomaaliyed ee ku nool dalka Airland ,taas oo ku aadan helista Baasaboorka soomaliga oo ay dhibaato badan ku qabaan xilliyada ay doonayaan.

Guddoomiyaha Jaaliyadda Soomaaliyeed ee dalka Airland Axmed Xassan Gadaf oo la soo xiriiriray Idaacadda Dalsan ee Muqdisho ayaa sheegay in dalka Airland ay ku nool yihiin dad lagu qiyaasay ilaa Saddex Kun oo ruux oo soomaali ah kuwaas oo siyaabo kala duwan ugu nool halka qaarkood ay Shaqeystaan.

Waxa uu sheegay in markii hore ay ku adkeyd qaabka nolosha dalka Airland Soomaalida balse Sanadihii ugu dambeeyey ay fahmeen,isla markaana kuwo ay wax bartaan kuwana ay Shaqeystaan.

Sidoo kale Guddoomiyaha Jaaliyadda Soomaaliyeed ee dalka Airland Axmed Xassan Gadaf  ayaa  sheegay in dalka Jamhuuriyadda Airland Soomaaliya aysan ku laheyn wax Safaarad ah.taasina ay keentay in uu adkaaday in dadka Soomaaliyeed ee ku nool dalka Airland in ay helaan Baasaboorka Soomaaliga.

Waxa uu hadalkiisa intaasi ku daray in markii hore  helida baasaboorka uu kala Shaqeyn jiray taliyihii hore ee Waaxda socdaalka iyo Jinsiyadaha Soomaaliya Janaraal Gaafow laakin la joojiyey sameyntaas Bishii June ee Sanadkii tegay ee 2017,isla markaana taasi ay ka dambeeyaan masuuliiinta Hay’adda Waaxda Socdaalka iyo jinsiyadaha ee Muqdisho.

Isaga oo sii hadlayay ayuu sheegay in xiriir ay la sameeyeen Madaxda Sare ee dowladda sida Madaxweynaha,isla markaana taasi shuruud looga dhigay in la helo Wasaaradda Arrimaha dibadda Soomaaliya,

Ugu dambeyn waxa ugu baaqay madaxda dalka in ay sida ugu dhaqsiyaha badan uga qeyb qaataan sidii safaarad looga furi lahaa dalka Airland.

Hoos Ka Dhageyso Wareysiga Guddoomiyaha Jaaliyadda Soomaaliyeed ee dalka Airland Axmed Xassan Gadaf.