Maleeshiyo hubeysan oo ka soo jeeda Beesha Biyamaal ayaa waxay barqanimadii maanta xoog ku galeen Xarunta Shirkadda Isgaarsiinta Hormuud ku leedahay magaallo-madaxda Gobalka Sh/hoose ee Marka.
Ninka hoggaminayo Maleeshiyadaasi oo lagu magacaabo Cabdi Kiyow ayaa u sheegay Radio Dalsan inay la wareegeen Xarunta Hormuud ee Marka, iyagoo ka caraysan in Madixii Xaruntaasi oo ka soo jeeday Beesha Biyomaal xilka laga qaaday, laguna bedelay  Nin kale oo ka soo jeeda Qabiil kale.
“Mas’uulkii hore waxaa Tababar loogu diray magaallaadda Muqdisho, kadibna Mas’uul kale ayaa loo soo magacaabay Maamulka Hormuud Marka†ayuu yiri Taliye Beeleedlaasi oo intaasi ku daray inay damiyeen Qalabkii Isgaarsiinta iyo Matoorka yaalla Xarunta Shirkadda Hormuud Telecom ee magaalladda Marka.
Tallabadda lagu damiyey Xaruntaasi ayaa waxay sababtay in hawada laga saaray Isgaarsiintii Hormuud ee magaalladda Marka iyo ilaa 35 Tuullo oo ku yaalla Gobalka Sh/hoose.
Waxa uu ku eedeeyey Shirkadda Isgaarsiinta ee Hormuud inaysan dhexdhexaad ka ahayn Dagaalka u dhexeeya Beelaha  Biyamaal iyo Habar-gidir ee ku dhex marayo magaalladda Marka iyo qeybo kale oo ka mid ah Gobalka Sh/hoose, waa sida uu hadalka u yiri.
Cabdi Kiyow waxa kale oo uu sheegay inay Hormuud qorsheynayso inay Xaruntooda haatan ku taallo magaalladda Marka u soo raraan dhinaca kale ee ay ku badan yihiin dadka ku abtirsada  Beesha Habar-gidir, waa sida uu hadalka u yiri.
Tobankii sanno ee la soo dhaafay waxa magaalladda Marka ku hardamay Mlaseeshiyo Beeleedyo iska soo horjeeda iyo dagaalka AMISOM iyo Alshabaab ee aan dhamaadka lahayn.
Taliyaha Maleeshiyadda Biyamaal ee qabsatay Xarunta Shirkadda Hormuud Marka, Cabdi Kiyow waxa kale oo uu eedeyn u jeediyey Hay’adda Hormuud Foundation, wuxuuna tilmaamay inaysan wax gargaar ah soo gaarsiinin dadka ku nool Marka, balse ay Kaalmooyinka Samafalka gaarsiiyaan qeybo kale ee ka tirsan Gobalka Sh/hoose.
Dhinaca kale, Mar ay Idaacadda Radio Dalsan  la xiriirnay Madaxda Qeybaha Suuq-geynta iyo Xiriirka Dadweynaha ee Shirkadda Isgaarsiinta Hormuud Telecom waxay ka gaabsadeen inay xaqiijiyaan ama beeniyaan Eedeymaha ay  Shirkadda Hormuud Telecom u soo jeedisay mid ka mid ah Beelaha wada degga magaalladda Marka.
©Radio Dalsan
