Madaxweyne Xasan Sheekh Maxamuud ayaa caawa kulan casho sharaf ah ku martiqaaday xildhibaannada labada aqal ee Baarlamaanka Federaalka Soomaaliya. Kulankan oo ka dhacay xarunta Madaxtooyada ayaa qeyb ka ah dadaallada xukuumadda ee ku aaddan isku keenidda aragtiyada iyo taageerada xubnaha Baarlamaanka, xilli ay socdaan diyaar-garowga doorashooyinka.
Xildhibaannada Baarlamaanka ayaa la soo gaarsiiyay farriimo rasmi ah oo ku saabsan inay caawa ka soo qaybgalaan kulankaasi. Warar ka ag dhow Madaxtooyada ayaa tilmaamaya in Madaxweynaha uu qorsheynayo inuu ka codsado xildhibaannada in muddo bil ah lagu daro kalfadhiga Baarlamaanka oo la filayo inuu dhowaan soo xirmo. Codsigan ayaa la sheegay inuu la xiriiro arrimo muhiim ah oo ay tahay in la dhameystiro ka hor inta aan kalfadhiga la soo gabagabeyn.
Sida lagu helayo warar ka imanaya ilo wareedyo ku dhow madaxtooyada, dowladda ayaa ka codsan doonta xildhibaannada inay ansixiyaan hindisayaasha doorashooyinka iyo in ay taageeraan magacaabista guddiyada muhiimka ah ee qabanqaabada doorashada, kuwaas oo door weyn ka qaadan doona hannaanka soo socda ee siyaasadda dalka.
Kulankan ayaa imaanaya iyadoo ay weli natiijo la’aan tahay Shirka Madasha Wadatashiga Qaran, kadib markii Madaxweynaha Jubbaland Axmed Madoobe uu isaga baxay shirkaas, arrintaas oo dib u dhigtay go’aanno muhiim ah oo la xiriira doorashooyinka, kuwaas oo la filayay in lagu dhawaaqo ka hor inta aan Baarlamaanka la fasixin. Xaaladdan ayaa dhalisay walaac ku saabsan waqtiga iyo hannaanka ansixinta arrimaha la xiriira doorashada oo laga yaabo inay dib u dhacaan haddii aan heshiis rasmi ah laga gaarin.
Kulankan caawa ayaa noqday mid si gaar ah loo hadal hayo, iyadoo la sugayo tallaabooyinka ku xigi doona iyo sida xildhibaannada uga jawaabi doonaan codsiyada madaxweynaha ee ku saabsan sii wadista kulamada kalfadhiga iyo ansixinta shuruucda doorashooyinka.
