Madaxweynaha dowlad Goboleedka Jubbaland Axmed Maxamed Islaam Axmed Madoobe, oo maalmahii lasoo dhaafay safar shaqo ku joogay magaalada muqdisho ayaa maanta dib ugu soo laabtay Magaalada Kismaayo ee Caasimadda KMG ah ee Jubbaland.
Mas’uuliyiin katirsan labada gole ee Maamulka iyo dadweyne kala duwan ayaa Madaxweynaha kusoo dhaweeyay Garoonka diyaaradaha sayid Maxamed Cabdille Xasan ee magaalada Kismaayo.
Madaxweynaha ayaa muqdisho kaga soo qeyb galay shirka madasha wadatashiga qaran ee arrimaha Doorashooyinka oo laga soo saaray go’aamo Cusub oo lagu sii dhaqaajinayo doorashooyinka golaha shacabka ee qeybo kamid ah dalka ka bilowday.
Sidoo kale inta uu ku sugnaa Muqdisho, Madaxweyne Axmed Maxamed Islaam Axmed Madoobe ayaa waxaa uu kulamo kala duwan la yeeshay Wakiilada Beesha Caalamka qaarkood, isagoo kala hadlay dardar-gelinta doorashooyinka.
