Madaxweynaha Jamhuuriyadda Federaalka Soomaaliya Xasan Sheekh Maxamuud ayaa Guddoomiyay Shirka Guddiga Qaran La-dagaallanka Lacag-dhaqidda iyo Ka-hortagga Maalgelinta Al Shabaab oo ku qabsoomay Xafiiska Amniga Qaranka ee Xarunta Madaxtooyada.
Guddiga ayaa Madaxweynaha Jamhuuriyadda la wadaagay warbixinno ku saabsan hannaankooda shaqo, guulaha laga gaaray xakamaynta ilaha dhaqaale ee Khawaarijta iyo qorsheyaasha cusub ee lagu wajahayo xeeladaha dhaqaale abuurka Al Shabaab, iyaga oo soo bandhigay Shaqsiyaad ka tirsan Al Shabaab oo lagu soo rogayo cuna-qabatayn dhaqaale.
Madaxweyne Xasan Sheekh ayaa dul istaagay muhiimadda dagaalka ka dhanka ah dhaqaalaha Al Shabaab u leeyahay ciribtirka dagaalamayaasha Al Shabaab iyo nabad kusoo dabaalidda dalka, isaga oo faray mas’ulliyiinta ku mideysan Guddigan in la dar dar geliyo qorsheyaasha burburinta ilaha dhaqaale ee Al Shabaab iyo ciribtirka khataraha maaliyadeed ee dalka, gaar ahaan lacag dhaqidda.
