Madaxweynaha dowlad Goboleedka Jubbaland Axmed Maxamed Islaam Axmed Madoobe oo Maanta soo gaaray Magaalada caasimadda ah ee Muqdisho ayaa ka hadlay ujeedka safarkiisa uu ku yimid Magaalada.
Madaxweyne Axmed Madoobe oo si kooban warbaahinta ula hadlay ayaa marka hore ka mahadceliyay soo dhaweynta ballaaran ee Garoonka Aadan Cadde ugu sameeyeen mas’uuliyiin ka tirsan dowladda Federaalka oo isugu jiray Xildhibaano iyo Wasiiro.
Madaxweynaha ayaa waxaa uu sheegay in uu Muqdisho u yimid ka qeybgalka Shirka Madasha Wadatashiga Qaran oo diirada lagu saarayo arimaha amniga dalka iyo sidii shacabka Soomaaliyeed iyo heerarka kala duwan ee Dowlada Soomaaliyeed ay ugu diyaar garoobi lahayeen isku tashi amni si xal looga gaaro dhibaatada amniga Soomaaliya.
Madaxweyneyaasha kale ee maamulada Koonfur Galbeed, Hirshabeelle, Puntland iyo Galmudug ayaa waxaa lagu wadaa in saacadaha soo socda soo gaaaran Muqdisho, si ay uga qeyb galaan Shirka Madasha Wadatashiga Qaran oo ka qabsoomaya caasimadda.
Shirka u dhaxeeya DFS iyo dowlad Goboleedyada ayaa ku soo aaday, iyadoo mad madow uu ka dhex jiro qaar ka mid ah dowlad Goboleedyada iyo dowladda, waxaana qaar kamid ah madaxda maamulada ay dhaliilsan yihiin hab-maamulka Madaxweyne Xasan Sheekh.
