Madaxweyne ku-xigeenka koowaad ee dowlad Goboleedka Jubbaland Maxamuud Sayid Aadan, ayaa maanta shir guddoomiyey kulanka golaha wasiirada Jubaland, kaasi oo ka qabsoomay Magaalada Kismaayo ee Xarunta Gobolka Jubbada Hoose.
Kulanka ayaa looga hadlay arrimaha Amniga iyo Xaaladda abaaraha ka jira deegaanada Jubaland, iyadoo warbixintaa uu jeediyey Madaxweyne kuxigeenka Jubaland.
Wasaarada amniga ayaa laga dhagaystay warbixinta amniga Jubaland ee todobaadkii tagay iyadoo wasaaradu ay ka warbixisay shaqooyinka u danbeeyay ee Wasaarada iyo hay’adaha amniga ay qabteen.
Wasaarada Gargaarka iyo maaraynta musiibooyinka ayaa ka warbixisay xaalada abaaraha iyo dadaalada ay Wasaarada oo kaashanaysa dhinacyada kala duwan ka wado meelaha Sida daran abaartu ay u saamaysay.
Madaxweyne Kuxigeenka Jubaland Maxamuud Sayyid Aadan ayaa baaq u diray ummadda Soomaaliyeed iyo Beesha Caalamka in ay ka qayb qaataan samata-bixinta dadka ay abaaruhu saameeyeen.
