Guddoomiyaha degmada Warsheekh ee Gobolka Shabeellaha Dhexe Xasan Maxamed Axmed Darafey oo xarunta degmada wareysi ku siiyay Telefashinka Dalsan ayaa beeniyay maalmihii lasoo dhaafay lagu faafiyey baraha Bulshada.
Guddoomiye Xasan Darafey ayaa waxaa uu sheegay in aysan waxba ka jirin wararka sheegayey in duleedka degmada Warsheekh iyo agagaarka degmadaas dhac loogu geystay gaari ay saarnaayeen dad shacab ah oo safar ahaa.
Guddoomiyaha ayaa hadalkiisa waxaa uu intaas kusii daray in habeeno kahor ay kormeer ku sameeyeen dhowr tuulo oo hoostagta degmada, isla markaana aysan jirin kooxo burcad ah oo Isbaaro u taalla ama wadada dad safar ahaa ku dhacay.
Sidoo kale Guddoomiye Darafey ayaa tilmaamay in dadka shacabka ee safarka ah looga baahan yahay inay Maamulka degmada kusoo wargeliyaan haddii ay dhibaato la kulmaan, si looga hortago wax kasta oo gaadiidka iyo shacabka dhibaato ku ah.
Gaba-gabadii Guddoomiyaha degmada Warsheekh ee Gobolka Shabeellaha Dhexe ayaa dadka wararka been abuurka ah ku faafiya baraha Bulshada ka dalbaday inay joojiyaan, oo aysan ka shaqeynin waxyaabo aan deegaanka ka jirin.
