Xildhibaanada Golaha Shacabka Baarlamaanka Federaalka ayaa Goor dhow waxaa uu kulan uga furmi doonaa Xarunta Villa Hargeysa ee Muqdisho, kulanka Golaha Shacabka ayaa waxaa hortegaya Madaxweynihii hore ee Soomaaliya Maxamed Farmaajo.
Ajandaha kulanka maanta ayaa ah doorashada Guddoomiyaasha Guddiyada joogtada Golaha shacabka iyo dhaarinta Madaxweynihii hore ee dowladda Soomaaliya Maxamed C/llaahi Farmaajo oo marka la dhaariyo noqonaya Xildhibaan Abadiya ah.
Inkastoo aanu weli kulanka la furin, haddana wararka laga helayo Xarunta Villa Hargeysa ayaa sheegaya in Mooshin lagu dalbanayo in aan la dhaarin Madaxweyne hore Maxamed C/llaahi Farmaajo ay gudbiyeen Xildhibaano uu hoggaaminayo C/raxmaan C/shakuur Warsame.
Xildhibaanada Golaha Shacabka ayaa intooda badan ku sugan Xarunta Villa Hargeysa ee Magaalada Muqdisho, waxaana goorsii horreeysay Xildhibaanada loo diray farriimo loogu wargelinayo in Maanta oo Axad ahuu jiro kulanka Golaha.
Shalay ayaa waxaa lagu waday inuu uu qabsoomo, balse Guddoomiye Sheekh Aadan Maxamed Nuur Sheekh Aadan Madoobe ayaa dib u dhigay kulankaas, sababo jiray awgood, waxaana baaqashiisa uu kusoo aaday, xilli uu socday weerarkii Hotelka Xayaat.
