Waxaa magaalada Nairobi si xawli ah uga socda kulamo siyaasadeed oo ay isugu yimaadeen madax hore oo ka tirsaneyd dowladihii dalka soo maray, kuwaas oo si adag uga soo horjeeda siyaasadda uu wado Madaxweyne Xasan Sheekh Maxamuud.
Kulamadan oo si gaar ah loo leeyahay ayaa waxaa ka qaybgalaya Ra’iisul Wasaareyaashii hore ee Soomaaliya – Maxamed Xuseen Rooble, Cabdiweli Sheekh Axmed, Cabdi Faarax Shirdoon (Saacid) – iyo guddoomiyihii hore ee Golaha Shacabka Maxamed Mursal Sheekh Cabdiraxmaan.
Wararka laga helayo kulanka ayaa tilmaamaya in si qoto dheer looga hadlay xaaladda siyaasadeed ee dalka, iyadoo diiradda la saaray xasilooni darrada siyaasadeed, khilaafaadka isa soo taraya, iyo walaaca sii kordhaya ee bulshada iyo beesha caalamka ka qabaan jihada dalka u socdo.
Siyaasiyiinta kulanka ayaa si wadajir ah u muujiyay in ay ka walaacsan yihiin ficillada iyo hab-dhaqanka dowladda talada haysa, kuwaas oo ay sheegeen in ay dhaawacayaan danaha guud ee shacabka Soomaaliyeed. Ra’iisul Wasaarihii hore Maxamed Xuseen Rooble ayaa bartiisa bulshada ku baahiyay qoraal uu ku xusay in dalka uu galay marxalad halis ah, islamarkaana loo baahan yahay xal qaran oo degdeg ah.
Waxaa sidoo kale kulanka laga soo saaray baaq ku wajahan dhammaan dhinacyada siyaasadda dalka, iyagoo ugu yeeray in la adkeeyo midnimada, la muujiyo isu tanaasul, islamarkaana la badbaadiyo jiritaanka iyo danta guud ee dalka.
Madaxda kulanka ka qaybgalay ayaa soo jeediyay in la bilaabo wadahadal qaran oo daahfuran, loona gudbo hannaan doorasho xor iyo xalaal ah oo ku dhacda waqtigeeda. Waxay xuseen in loo baahan yahay heshiis guud oo salka ku haya kalsooni dadweyne iyo wada-tashi qaran.
Kulamadan Nairobi ka socda ayaa loo arkaa kuwo horseedi kara isbedel siyaasadeed oo weyn, iyadoo mucaaradku uu u muuqdo mid isu diyaarinaya olole xooggan oo lagu muujinayo cadaadis siyaasadeed oo ka dhan ah Villa Soomaaliya. Dhanka kalena, kulamadu waxay noqon karaan fursad lagu dhiso hannaan cusub oo siyaasadeed oo ku saleysan wada hadal, heshiis iyo hufnaan.
