Khasaaro ka dhashay Hoobiyeyaal lagu garaacay xaafaddo ka tirsan Muqdisho

Faah faahino ayaa laga helayaa tirro hoobiyeyaal ah oo xalay ku dhacay xaafaddo ku yaalla agagaarka Iskuul buliisiya ee degmada Xamar-jajab ee Gobolkaan Banaadir, jugta hoobiyeyaasha ayaa laga maqlay xaafaddo ka tirsan Magaalada Muqdisho.

Dad la hadlay Idaacadda Dalsan ayaa u sheegay in illaa shan madfac ay kusoo dhaceen aaga Iskuul buliisiya gaar ahaan guryo ay degan yihiin shacab ah, isla markaana waxaa ka dhashay khasaaro isugu jira dhimasho iyo dhaawac oo gaaray dad shacab ah.

Inta la xaqiijiyey Hooyo iyo 4 carrruur ah oo ay dhashay ayaa ku dhintay hoobiyeyaasha, kadib markii uu gurigooda ku dhacay mid ka mid ah hoobiyeyaashaasi ee la soo tuuray, waxaana sidoo kale ku dhaawacmay aabaha qoyskaas oo loo qaaday Isbitaal.

Sidoo kale dad dhow 6 ruux ayaa ku dhaawacmay hoobiyeyaasha xalay lagu garaacay xaafaddo ku yaalla agagaarka Iskuul buliisiya ee degmada Xamar-jajab ee Gobolkaan Banaadir, laamaha ammaanka dowladda Federaalka ayaan weli ka hadlin falkaan.

Weerarkaan loo adeegsaday hoobiyeyaasha ayaa ku soo aadayo, ayada oo weli uu socdo howlgalka lagu soo afjarayo weerarka tooska ahaa ee ay  Al-Shabaab ku qaaday hoteelka Xayaat ee magaalada Muqdisho, kaas oo soo billowday fiidkii hore ee xalay.

About Webmaster

View all posts by Webmaster