Guddiga doorashada dowlad Goboleedka Galmudug ayaa xalay soo saaray Liiska kuraas ka tirsan Golaha Shacabka Baarlamaanka 11-aad ee dowladda Federaalka, kuwaasi oo deegaan doorashadoodu tahay Magaalada Gaalkacyo ee Xarunta Gobolka Mudug.
Qoraal uu soo saaray Guddiga doorashada ayaa lagu shaaciyey qabashada doorashada saddex kursi oo kamid ah kuraasta Golaha Shacabka ee Galmudug, waxaana kuraasta la soo saaray ku jira kursiga #HOP069 oo uu ku fadhiyo Xildhibaan C/raxmaan Odawaa.
Guddiga ayaa sidoo kale sheegay in diiwaan-gelinta Musharaxiinta u tartamaya saddexda kursi ay bilaabaneyso 11-ka bishaan Maarso, isla markaana doorashada la qabana doono 12-ka bisha, taasi oo ka dhaceysa Magaalada Gaalkacyo ee Xarunta Gobolka Mudug.
Kursiga tirsigiisu yahay #HOP069 oo uu ku fadhiyo Xildhibaan C/raxmaan Odawaa ayaa la filayaa inuu noqdo kursi siweyn loogu loolamo, isla markaana waxaa Musharaxiinta u sharxan ku jira Wasiir ku-xigeenka Warfaafinta Cabdiraxmaan Sheekh Yuusuf Al-cadaala.
Maamulka Galmudug ayaa si dardar leh u wada doorashada Golaha Shacabka Baarlamaanka 11-aad ee dowladda Federaalka Soomaaliya, waxaana haatan doorashadoodu ka socotaa deegaan doorashada labaad ee Gaalkacyo.
