Dowladda Iran ayaa habeenkii xalay weerar gantaallo ah ku qaaday saldhigga ciidamada cirka ee Mareykanka ku leeyahay dalka Qatar, gaar ahaan saldhigga weyn ee Al Udeid, sida ay xaqiijiyeen ilo wareedyo rasmi ah.
Ciidanka Ilaalada Kacaanka Islaamiga ah ee Iran (IRGC) ayaa sheegay inay si toos ah u beegsadeen saldhiggaas milatari, iyaga oo adeegsaday gantaallo casri ah oo wax burburin kara. Warbaahinta rasmiga ah ee dalka Iran, Wakaaladda Tasnim, ayaa sidoo kale xaqiijisay weerarka, waxayna ku tilmaamtay mid rasmi ah oo ah farriin cad oo looga jawaabayo ficillada Mareykanka.
Warbaahinta caalamiga ah ee CNN ayaa werisay in weerarro dhowr ah oo ay ku jiraan gantaallo iyo diyaarado aan duuliye lahayn lagu qaaday saldhigyada Mareykanka ee ku kala yaalla Iraq iyo Qatar. Ciidamada Mareykanka ayaa la sheegay inay si degdeg ah uga jawaabeen weerarradaasi, iyagoo qaaday tallaabooyin difaac ah.
Wasiirka Arrimaha Dibadda ee Iran, Cabbaas Araghchi, ayaa weerarkan ku tilmaamay “jawaab cad oo ka dhan ah gardarrada Mareykanka ee ku aaddan madax-bannaanida dhuleed iyo qarannimada Iran.”
Dhanka kale, Madaxweynaha Mareykanka Donald Trump ayaa ka hadlay dhacdadan, isagoo sheegay in uu rajo ka qabo in Iran ay hadda diyaar u tahay xabbad-joojin. Trump ayaa sidoo kale tilmaamay in Iran ay bixisay ogaysiis horudhac ah kahor weerarka, taas oo suurto-galisay in aysan jirin wax khasaare nafeed ah.
“Waxaa laga yaabaa in Iran ay hadda diyaar u tahay nabad iyo wada noolaansho gobolka. Waxaan sidoo kale ku dhiirrigelinayaa Israa’iil inay qaadato talaabooyin nabadeed,” ayuu Trump ku sheegay qoraal uu soo dhigay baraha bulshada.
Weerarkan ayaa imaanaya xilli xiisadda u dhaxeysa Tehran iyo Washington ay mar kale cirka isku shareertay, gaar ahaan kadib duqeymihii Mareykanku la beegsaday goobo muhiim ah oo la xiriira barnaamijka nukliyeerka Iran.
