Ciiddanka Iiraan ayaa la sheegay inay ku fashilmeen weerar Gantaal oo ay la maaganaayeen Diyaarad Daroonis oo ay Maraykanka lahaayeen, ka hor inta aan labada Markab ee nooca shidaalka lagu qarxinin Badda loo yaqaano Gacanka Cumaan ee Marin-biyoodka Hormuz.
Warbaahinta Maraykanka, gaar ahaan Telefishinka CNN-ka waxa uu shalay ka soo xigtay Sarkaal ka tirsan Milliteriga Marayaknka ayaa sheegtay in Gantaal lagu soo tuuray Diyaarad Daroonka nooca wax basaasta ee MQ-9 Reaper oo ilaalo ka haysay Maraakiibta Iiraan eeu soo dhaawaday Labada Markab ee ay waxyeelladu soo gaartay shalay, kuwaasi oo laga kala lahaa dalalka Norway iyo Japan.
Ciiddanka Iiraan ee la socotay Maraakiibta ayaa la sheegay inay ka war heleen Daroonka Maraykanka ee ku dul-meeraysanaysay, waxayna ku ganeen Gantaal nooca Lidka Diyaaradaha, balse waa ay la gafeen, wuxuuna Gantaalka ku dhacay Badda.
Isla ilo-wareed ayaa u sheegay Telefishinka CNN-ka in labo maalin ka hor shilkii Khamiistii in Diyaraad kale oo Draoonis oo ay Maraykanka lahaayeen lagu soo riday Badda Cas, iyadoo ay Maleeshiyadda Xuutiyiinta la beegsadeen Gantaal lagu soo farsameeyey Iiraan.
Khamiistii la soo dhafaay, 2 Markab nooca shidaalka ayaa waxay waxyeello ka soo gaareen qaraxyo iyo rasaas ka dhacday Gacanka Cummaan, meel ku dhow Gacan-biyoodka Hormuuz.
Inkastoo aan la aqoonin waxa sababay shilkaasi, haddana, Dowladda Maraykanka waxay ku eedeysay Iiraan inay ka dambeyeen qaraxyadaasi, inkastoo aysan Maraykanka soo bandhigin wax caddaymo ah oo taageeraya eedeyntooda.
Muuqaalka Video-ga ee ay Maraykanka baahiyeen waxaa laga arkayey wax lagu sheegay Ciiddanka Iiraan oo miino aan qarxin ka bixinaya mid ka mid ah Maraakiibta shidaalka.
Bale, muuqaalka ma muujinin magacyadda ama Calamkadda doonyaha, kaasi oo taageeri lahaa xaqiijinta sheegashadda Maraykanka.
Dowladda Iiraan waxay beenisay dhamaan Eedeymaha lagu sheegay inay door ku lahayd qaraxyada loo geystay Labada Markab.
Dowladda Raashiya waxay ku baaqday Baaritaanka shilkaasi, waxayna ka soo horjeesatay in Iiraan dhabarka loo saaro eedeyn aysan ku lug lahayn.
