Ciidanka Booliska dowladda Federaalka Soomaaliya gaar ahaan kuwa qeybta Bari ayaa xalay howlgalo saacado qaatay waxaa ay ka sameeyeen xaafaddo ka tirsan deegaanada Gubadley, Daarusalaam iyo degmada Yaaqshiid ee Gobolkaan Banaadir.
Inta uu socday howlgalka ayaa waxaa ay Ciidamada kusoo qabteen dad u badan dhallinyaro oo laga isaga keenay xaafaddo kala tirsan deegaanada howlgalka laga fuliyay, kuwaasi oo laga isugu geeyay goob barxad, kadibna baaritaano lagu sameeyay.
Howlgalkaan ayaa waxaa hoggaaminayey Guddoomiyeyaasha degmooyinka Yaaqshiid, Hiliwaa iyo Taliyaha Booliska qeybta Bari, waxaana ujeedkiisa uu ahaa mid lagu doonayey in lagu xaqiijiyo ammaanka deegaanada Gubadley iyo Daarusalaam oo mararka qaar ay ka dhacaan falal amni darro.
Guddoomiyaha degmada Yaaqshiid Axmed Cabdullaahi Cariif oo la hadlay ayaa waxaa uu sheegay in howlgalkaan loogu tala-galay dardar-gelinta amniga Caasimadda, wuxuuna shacabka degmadiisa ka dalbaday inay Nabadda kala shaqeeyaan Ciidamada.
Taliyaha Booliska qeybta Bari Gaashaanle Cali Calasow Xasan Goofjooge ayaa isna dhakiisa sheegay inay duulaan ku yihiin cid kasta oo amni darro sida: dadka dilalka iyo dhaca geysta, isagoo xusay in howlgalka uu noqon doono mid joogta ah oo la fuliyo.
