Ciidanka Dowlad Goboleedka Purntland ayaa hawlgal qorshaysan oo ay ka fuliyeen xaafadda Garsoor ee magaalada Gaalkacyo waxaa ay kusoo qabteen mid ka mid ah Hoggaamiyeyaasha kooxaha ka ganacsada Maandooriyaha.
Saraakiisha Ammaanka ayaa xaqiijiyay in gacanta lagu dhigay hoggaamiyaha, oo sida la sheegay in muddo ah ay Ciidanka Boolisku Baadi goobayeen, kaasi oo sida la sheegay ku dhuumaalaysanayay xaafadda Garsoor ee magaalada Gaalkacyo.
Wararka ayaa intaas ku daraya in sidoo kale ay Ciidanku gacanta ku dhigeen shakhsiyaad kale oo ku lug leh ka ganacsiga maandooriyaha.
Shaqsiyaadka ayaa ahaa kuwo in muddo ah lagu raad joogay, waxaana hoggaamiyaha la qabtay uu si gaar ah uga ganacsanayay Khamriga sida ay sheegeen Saraakiisha ammaanku.
Shabakadda ay gacanta ku dhigeen Boolisku ayaa haatan waxaa loo dhaadhiciyay Xabsiga, waxaana ku socdo baaritaanno dheeraad ah oo lagu sameynayo shaqsiyaadka lasoo qabtay.
Degaanada Maamulka Puntland ayaa waxaa waayadii dambe ku soo badanayay dadka ka ganacsata Maandooriyaha, waxaana horay Ciidanka ammaanku ay soo bandhigeen Shabakadu ka ganacsan jiray Khamriga, kuwaasi oo intooda badan la xukumay.
