Wararka aan ka heleyno deegaanka Kaxan-dhaalle ee Gobalka Galgaduud ee Maamulka Galmudug ayaa waxaa ay sheegayaan in halkaas saakay lagu dilay Haweeney kamid aheyd dadka deegaanka, xili ay la joogtay oo ay ilaashaneysay xoolo ay laheyd.
Qaar kamid ah dadka deegaanka Kaxan-dhaalle ayaa ku warramay in rag hubeysan oo maleeshiyo beeleed ah dileen haweeneyda oo aheyd Xaamilo, iyagoona ku furay rasaas, oo sababtay in markii dambe ay haweeneyda goobta ku geeriyooto.
Allaha u naxariistee Marxuumada ayaa waxaa lagu magacaabi jiray Hodan Cabdi Jaamac oo aheyd haweeney xoolo dhaqato ah, waxaana goobta uu falku ka dhacay tegay qoyskeeda oo halkaas ka qaaday Meydka, lana geeyay Magaalada Gelinsoor.
Dilka loo geystay Hodan Cabdi ayaa waxaa la tilmaamay inuu salka ku haayo aano qabiil, isla markaana waxaa ragga dilay ee maleeshiyaadka ahaa ay horey usii dhaawaceen haween kale oo xoolo dhaqato ah, kuwaasi oo dhaawacooda la dabiibayo.
Madaxda Magaalada Gelinsoor iyo Odayaasha ayaa ay sheegeen in falkan dhacay uu ka fog yahay diinta Islaamka iyo dhaqanka suuban uu keeni karo falal kale oo fool xun, hadii aan Maamulada dariska ah ee Galmudug iyo DDS aysan xaalada soo fara-galin.
Dhacdadaan lagu dilay Hodan Cabdi Jaamac ayaa waxaa Maanta aad looga hadal hayaa deegaanka Kaxan-dhaalle iyo Gelinsoor ee Gobolka Galgaduud, waxaana xusid mudan dhacdadaan kuwo lamid ah ay horey uga dhaceen dhulka Soomaalida…
