Guddoonkii hore ee Baarlamaanka Jubbaland oo Dib loo wada doortay

Magaalada Kismaayo ayaa Maanta waxaa lagu qabtay Doorashada Guddoomiyaha Baarlamaanka dowlad Goboleedka Jubbaland iyo ku-xigeenadiisa.

Xildhibaanada Baarlamaanka Jubbaland ayaa Guddoomiyihii hore ee Baarlamaanka Cabdi Maxamed Cabdiraxmaan u doortay inuu noqdo Guddoomiyaha Cusub ee Baarlamaanka Jubbaland.

Aadan Khaliif Xaaji ayaa loo doortay inuu noqdo Guddoomiye ku-xigeenka 1-aad ee Baarlamaanka Jubbaland,halka Cabdi Baaleey Xuseen isna loo doortay Guddoomiye ku-xigeenka labaad ee Baarlamanka Jubbaland.

Aadan Khaliif ma jirin wax Musharax ah oo la tartamay,waxaana Xildhibaanada ku doorteen Cod gacan taag ah,isagoo helay 72 cod.

Sidoo kale Cabdi Baaleey Xuseen ayaa waxaa tanaasulay Musharaxii la tartami lahaa,sidaasina ayay Xildhibaanada Cod gacan taag ah ku Doorteen,waxaan uu helay 73 Cod.

Dhammaan Guddoonkii hore ee Baarlamaanka dowlad Goboleedka Jubbaland ayaa si rasmi ah u soo wada noqday,kuwaasi oo Afartii sano ee la soo dhaafay soo shaqeeyay.

Sidoo kale hoolka ay Doorashada ka dhacday ayaa waxaa ku wada sugnaa, Xildhibaanada Jubaland ee la dhaariyey dhammaantood,Odayaasha dhaqanka, Xildhibaanada labada aqal ee Baarlamaanka Soomaaliya iyo marti-sharaf kale.

Ammaanka goobta doorashadu ka dhaceysay ayaa Maanta siweyn loo adkeeyay,isla markaana waxaa si Wadajir ah u sugaya Ciidamada nabadgalyada dowlad Goboleedka Jubbaland iyo kuwa Midowa Afrika ee Ciidamada AMISOM.

Comments
Loading...