Guddoomiyaha Guddiga hirgalinta doorashooyinka dadban ee heer dowlad Goboleed ee Jubbaland ( SEIT) Dr Siyaad Maxamed Mursal ayaa xafiiskiisa kulan kula qaatay Saraakiil ka socotay Booliska AMISOM oo qayb ka ah Ciidamada ilaaliya amaanka goobta doorashada.
Kulanka ayaa waxaa looga wada hadlay sii xoojinta sugida amniga goobta lagu qabto doorashada kuraasta ka tirsan Golaha Shacabka Baarlamaanka 11-aad ee dowladda Federaalka ee Magaalada Kismaayo, taasi oo heer gaba-gabo ah mareysa.
Guddoomiyaha Guddiga hirgalinta doorashooyinka Dr Siyaad Maxamed Mursal ayaa Saraakiisha AMISOM ka dhageystay Warbixino ku aadan xaaladda amniga goobta doorashada lagu qabto, isal markaana waxaa uu Guddoomiyaha ku boggaadiyey Saraakiisha Ciidamada dardar-gelinta howlaha sugida amniga.
Magaalada Kismaayo ayaa waxaa lagu wadaa in todobaadkaan lagu soo gaba-gabeeyo doorashada Golaha Shacabka Baarlamaanka 11-aad, waxaana socda diyaar garowgii ugu dambeeyay ee lagu qabanayo doorashada kuraasta harsan ee Jubbaland.
Maamulada Jubbaland iyo Hirshabeelle ayaa kaliya harsan inay soo dhameeyaan doorashada Xildhibaanada Golaha Shacabka, iyada ay soo gaba-gabeeyeen maamul Goboleedyada Koonfur Galbeed Soomaaliya, Puntland iyo Galmudug.