Diyaaradaha Dagaalka ee Taliyaha Khaliifa Xaftar ee ku kacsan Dowladda Libya ee ay QM taageersan ayaa la sheegay inay duqeeyeen Xarun lagu hayo dadka Muhaajiriinta iyo kuwa Qaxootiga oo ku taalla Bariga Caasimadda dalkaasi ee Tripoli.
Afhayeenka Hay’adda Gurmadka Degdegga ee dalkaasi, Malik Mersak ayaa sheegay in Diyaaradaha Ciiddanka Khaliifa Xaftar ay xilli dambe oo xalay ahayd duqeyn la beegsadeen Xarunta lagu hayo Muhaajiriinta ee Tajura, halkaasi oo hoy u ah in ka badan 600 qof oo shisheeye sharci-darro ku jooga dalkaasi.
Duqeynta ayaa la sheegay inay ku habsatay qeyb ay ku jiraan ilaa 150 qof oo Qaxooti iyo Muhaajiriin ka soo kala jeeda dalalka Somalia, Sudan iyo Eritrea.
Wararka hordhaca ee ay Dowladda Liibiya soo saartay laguma shaacinin dalalka ay ka soo kala jeedaan dadka lagu dilay ama lagu dhaawacay duqeyntaasi.
Xarunta Tajura ee la duqeeyey waxaa la sheegay inay u dhow yihiin Xerooyin Milliteri oo ay leeyihiin Ciiddanka Isbahaysiga ee hoos-taga Dowladda ay QM aqoonsan tahay ee dalkaasi.
Madaxtooyadda dalkaasi waxay cambaareeyeen duqeyntaasi, waxayna Beesha Caalamka ugu qaadeen in Tallaabo laga qaado Ciiddanka uu hoggaamiyo Khaliifa Xaftar.
Dhinaca kale, Guddoomiyaha Ururka Midowga Afrika, Muusa Faki Maxamed waxa uu si kulul u cambaareeyey duqeyntaasi, wuxuuna codsaday in lala xisaabtamo kuwii ka dambeeyey xasuuqaas bahalnimadda ee loo geystay dad Birri-ma-geydo ahaa.
Waxa uu ku booriyey Beesha Calaamka inay kordhiyaan dadaalkooda ku aadan sidii kooxaha ku dagaalamaya dalka Liibiya la isugu keeni lahaa Miiska Wada-xaajoodka, si loo soo gebegebeeyo colaadda ka aloosan dalkaasi.
Sidoo kale, Hay’adda QM ugu qaabilsan Arrimaha Qxaootiga ee UNHCR waxay sheegtay in duqeyntaasi lagu dilay ugu yaraan 30-qof, halka tobaneeyo kalena lagu dhaawacay, waxayna walaac xooggan ka muujisay Bad-qabka Muhaajiriinta iyo Qaxootiga ku jira Xarumaha dadka lagu hayo ee ku yaalla caasimadda dalka Libiya ee Tripoli.
UNHCR waxay sheegtay inay xaallad khatar ah ku jiraan 3,500 oo Qaxooti iyo Muhaajiriin ah lagu hayo Xarumaha dadka lagu hayo ee dalkaasi, ee u dhow goobaha goobaha lagu dagaalamayo.
