Warar dheeraad ah ayaa laga helayaa kooxo hubeysan oo xalay xaafad ka tirsan degmada Afgooye ee Gobolka Shabeellaha Hoose dil ugu geystay wiil la sheegay inuu dhallinyaro ahaa oo kamid ahaa dadka deegaanka degmadaasi.
Dilkaan ayaa waxa uu si gaar ah uga dhacay xaafadda dhagax-tuur ee Afgooye, waxaana dabley hubeysan ay toogasho ku dileen wiilka dhallinyarada oo u dhintay rasaas looga dhuftay qeybaha sare ee jirkiisa, waxaana markii dambe goobta laga qaaday Meydka.
Dad la yaqaanay wiilka la dilay ayaa magaciisa ku sheegay Cabduqaadir Cabdi Cismaan, oo aan weli la ogeyn sababta loo dilay, balse dilkiisa ayaa waxa uu qeyb ka noqonayaa dilal horey Afgooye loogu dilay dad isugu jiray shacab, mas’uuliyiin iyo Askar ciidan.
Ciidamo ka tirsan kuwa ammaanka degamada ayaa falka kadib tagay xaafadda dhagax-tuur oo uu dilka ka dhacay, isla markaana waxaa la sheegay inay sameeyeen baaritano kooban oo ay ku baarayaan dilkaas dhacay, oo ay kooxihii geystay ay baxsadeen.
